युनिकोड
प्रधानमन्त्री कप एक दिवसीय राष्ट्रिय क्रिकेट प्रतियोगितामा बिर्सनलायक प्रर्दशन गरेको कोसी प्रदेशले लगातार आठौँ हार व्यहोरेको छ।
बुधबार भएको खेलमा कोसी सुदूरपश्चिम प्रदेशसँग ८ विकेटले पराजित भएको हो। कोसीमाथि जित निकालेको सुदूरपश्चिम ८ अंकमा तालिकाको दोस्रो स्थानमा छ।
कोसीले दिएको १ सय २४ रनको लक्ष्य सुदुरपश्चिमले २१.१ ओभरमा २ विकेटको क्षतिमा भेट्टायो।
सुदूरका लागि नरेन भट्ट ५४ र प्रकाश पाण्डे ३४ रनमा अविजित रहे।
४९ बलको सामना गरेका नरेनले ७ चौका मद्दतमा ५४ रनमा नटआउट रहे। प्रकाशले ४२ बलमा १ चौका हान्दै ३४ रन बनाए।
कप्तान राजु रिजाल २१ रनमा क्याच आउट भए। खडक बोहोराले ९ रन बनाए।
कोसीका फिर्दोस अन्सारीले २ विकेट लिए।
त्यसअघि कीर्तिपुरस्थित त्रिवि क्रिकेट मैदानमा टस जितेर ब्याटिङ गरेको कोशी प्रदेश ३२ ओभरमा १ सय २३ रनमा अलआउट भयो।
कोसीका लागि मिनास थापाले बनाएको २६ रन नै सर्वाधिक रह्यो। कप्तान अंकित थापाले २२ रन थपे। कमल खत्री १८ र फिर्दोस अन्सारी १३ रनमा आउट भए। अन्य ब्याटरले दोहोरो अंकको स्कोर छुन सकेनन्।
कोसीलाई कम स्कोरमा रोक्न घातक बलिङ गरेका शेर मल्लले ५ विकेट लिए। ६ ओभर बलिङ गरेका उनले १ मेडन राख्दै २८ रन खर्चे।
विकासले ७ ओभरमा १ मेडन राख्दै ४ विकेट झार्दा मात्र ९ रन दिए।
प्रतिक्रिया