मुस्ताङमा तेस्रो स्की प्रतियोगिता हुने

हिमाली जिल्ला मुस्ताङको वारागुङ मुक्तिक्षेत्र गाउँपालिका–१ मुक्तिनाथमा तेस्रो राष्ट्रिय स्की च्याम्पियनसिप–२०२० यही माघ १८ गतेदेखि हुने भएको छ। नेपाल स्की संघद्वारा आयोजना गरिने प्रतियोगिताको फाइनल खेल माघ २० गते हुने संघका अध्यक्ष तथा सांसद जीवनराम श्रेष्ठले बताए।

स्की प्रतियोगिताले नेपाललाई विश्वमा चिनाउन सकिने, यस्ता साहसी खेलको माध्यमले भ्रमण वर्ष २०२० मा हिमाली क्षेत्रहरुको पर्यटन प्रवद्र्धनमा मद्दत पुग्ने र गाउँपालिका, प्रदेश र केन्द्र सरकारको ध्यानाकर्षण गराउने सांसद श्रेष्ठले बताए।

स्की हिउँमा खेलिने खेल हो। मुस्ताङमा दोस्रो पटक आयोजना गरिएको स्की खेल प्रतियोगिताले मुस्ताङको बेमौसमी व्यापारको घाटालाई पुर्ति गर्नुका साथै खेल पर्यटनमा सहयोग पुग्ने मुक्तिनाथका पर्यटन व्यवसायी सुरज गुरुङले बताए।

संघको आयोजनामा गत वर्ष जिल्लाको मुक्तिनाथमा आयोजित दोस्रो स्की प्रतियोगिताको स्नोबोर्डिङ स्की र अल्पाइन स्की विधामा प्रतिस्पर्धा गर्न १५ महिला र १६ पुरुष खेलाडीले भाग लिएका थिए। यस वर्ष प्रतियोगितामा स्नोबोर्डिङ स्की, अल्पाइन स्की र क्रस कन्ट्री स्की प्रतियोगिता राखिने तथा युवाहरुलाई तालिम दिने संघका महासचिव विजय श्रेष्ठले बताए। स्की तथा स्नो बोर्डिङलाई नेपालमा लोकप्रिय खेलका रूपमा विकास गर्दै अन्तर्राष्ट्रिय प्रतियोगितामा नेपालको सम्मानजनक उपस्थिति कायम गर्न यस प्रकारको तालीमले सहयोग पुग्ने श्रेष्ठको जिकिर छ।

नेपालको इतिहासमा स्की प्रतियोगिता गराएको हालसम्म तीन वर्ष भएको छ। दुई वर्षअघि रसुवाको लाङटाङमा, गत वर्ष मुक्तिनाथमा र यसपालि पनि मुक्तिनाथमै गर्न लागिएको हो। खेलका लागि उपयुक्त स्थान मुक्तिनाथ क्षेत्र भएका कारणले मुक्तिनाथ र मुस्ताङका विभिन्न सम्भावित क्षेत्रको अध्ययन गरी गाउँपालिका र नेपाल सरकारसँग समन्वय गरेर ती स्थानलाई स्की खेलका रूपमा विकास गरिने आयोजकले बताएका छन्।

आवश्यक पूर्वाधार विस्तार गर्न सक्ने हो भने मुस्ताङमा स्की खेलको सम्भावना अत्यन्तै राम्रो रहेको सांसद प्रेमप्रसाद तुलाचनले बताए। हालसम्म कृषि र पर्यटनले चिनिएको मुस्ताङ अब खेलले पनि चिनिने तुलाचनल बताए। रासस