युनिकोड
पाँचौँ आरबीबी एनभीए राष्ट्रिय क्लब महिला तथा पुरुष भलिबल च्याम्पियनसिपअन्तर्गत महिलातर्फको सेमिफाइनल समीकरण पूरा भएको छ।
मंगलबार सम्पन्न समूह एको समूह विजेताको लागि विभागीय डर्बीमा भएकोे प्रतिस्पर्धामा सशस्त्र प्रहरीको एपीएफले त्रिभुवन आर्मीमाथि ३–१ को जित निकाल्दै समूह विजेता बन्यो। एपीएफले आर्मीलाई २५–१०, १९–२५, २५–१८, २५–११ को सेटमा पाखा लगायो। दुवै टिम यसअघि नै सेमिफाइनल प्रवेश गरिसकेका थिए।
महिलाकै समूह बीको प्रतिस्पर्धामा होङ्गवान्जी न्यू डायमण्ड स्पोर्टस् क्लबले ढोरपाटन स्पोर्टस् क्लबलाई ३–० को सोझो सेटमा पाखा लगायो। डायमन्डले ढोरपाटनलाई २५–३, २५–१६, २५–१२ को सेटमा हराउँदै समुह विजेता बन्दै आर्मीसँगको भेट पक्का गरेको हो।
सेमिफाइनलमा एपीएफले समूह बीको उपविजेता अर्को विभागीय टोली नेपाल पुलिस क्लबसँग र टीएसीले समूह बीको विजेता होङ्गवान्जी न्यू डायमण्ड स्पोर्टस् क्लबसँग फाइनल प्रवेशका लागि प्रतिस्पर्धा गर्नेछन्।
राष्ट्रिय खेलकुद परिषद्को कभर्डहलमा सञ्चालित प्रतियोगिताको पुरुषतर्फको क्वार्टरफाइनल समीकरण पूरा भएको छ। एपीएफले ग्रुप बीमा जावलाखेल भलिबल ट्रेनिङ्ग सेन्टरलाई २५–१४, २५–१०, २५–०९ को सोझो सेटमा पराजित गर्दै ६ अंकसहित समूह विजेता भयो।
यस्तै पुलिसले पनि समूह सीको खेलमा मणिमुकुन्द भलिबल क्लब (एमभीसी)लाई २५–१४, २५–२०, २५–१४ ले पराजित गर्दै समूह विजेता बन्न सफल भयो।
पुरुषतर्फ क्वाटरफाइनलमा समूह एको विजेता सेनाको टीएसीले समूह सीको उपविजेता मणिमुकुन्द भलिबल क्लबसँग प्रतिस्पर्धा गर्नेछ। यस्तै समूह बीको विजेता एपीएफले समूह डीको उपविजेता बुद्धटोल युवा भलिबल क्लबसँग प्रतिस्पर्धा गर्नेछ।
समूह सीको विजेता नेपाल पुलिस क्लबले समूह एको उपविजेता नयाँबजार सामाजिक युवा क्लबसँग तथा समूह डीको विजेता हेल्प नेपाल स्पोर्टस क्लबले समूह बीको उपविजेता बुलबुले रारा क्लबसँग प्रतिस्पर्धा गर्ने भएका छन्।
प्रतियोगितामा बुधबार पुरुषतर्फको क्वाटरफाइनलका खेलहरु हुनेछन्।
प्रतिक्रिया