बिगबासमा सन्दिपको टोलीको लगातार दोस्रो जित

नेपाली लेग स्पिनर सन्दिप लामिछाने सम्मिलित मेलवर्न स्टार्सले बिगबास लिगमा लगातार दोस्रो जित हात पारेको छ।

सन्दिप सम्मिलित टोलीले आइतबार भएको खेलमा होबर्ट हेरिकेन्सलाई ५२ रनले पराजित गर्दै लिगको अंक तालिकाको दोस्रो स्थानमा उक्लिएको छ। एक खेलमा जित र एकमा हार भोगेको हेरिकेन्स २ अंकमा तालिकाको चौथो स्थानमा छ।

सातौ ओभमा बलिङ गर्न आएका लामिछानेले ३ ओभर बलिङ गर्दै १८ रन खर्चेर १ विकेट लिए। घातक बलिङ गरेका हरिस रोफले आफ्नो स्पेलमा २७ रन खर्चेर ५ विकेट लिए।

टस जितेर पहिले ब्याटिङ गरेको मेलर्बन स्र्टासले निर्धारित २० ओभरमा ४ विकेट गुमाउँदै १ सय ६३ रनको योगफल तयार पारेको थियो। ओपनिङ ब्याट्सम्यान मार्कुस स्टोइनिसले ८१ रनको उल्लेख्य पारि खेले। निक म्याडिसनले ४० रनको योगदान गरे।

१ सय ६४ रनको योगफल पछ्याएको होबर्ट हेरिकेन्स १६ ओभरमा १ सय ११ रन जोड्दा अलआउट भयो। सन्दिपको टोलीले २७ तारिकमा ऐडिलेड स्ट्राइकर्ससँग खेल्नेछ।