कीर्तिपुरस्थित त्रिवि क्रिकेट मैदानमा बुधबार टस हारेर पहिले ब्याटिङको निम्तो पाएको एमसीसीले खराब प्रकाशका कारण ८७ ओभरमा खेल रोकिदा ६ विकेट गुमाएर ३ सय ११ रनको बलियो योगफल तयार पाएको हो। तीन खेलाडीले अर्धशतकीय पारी खेल्दै एमसीसीलाई सो स्कोरमा पुर्याएका हुन्।
उसका विल रोड्सले सर्वाधिक ७३ रनको अर्धशतकीय इनिङ्स खेले। ११० बलको सामना गरेका उनले १२ चौका प्रहार गरे। विल भान्डेर्सपारले ५३ रन जोडे। ९६ बल खेलेका उनले ८ चौका प्रहार गरे।
यस्तै मिल्स हाम्मोन्डले ५८ बलमा ८ चौकासहित ५२ रनको अर्धशतकीय इनिङ्स खेले। त्यस्तै टम वेस्ट्लीले ३९ रन, एड योङले १७ तथा बिली गोडलम्यान १० रनमा आउट भएका छन्। यासिर अराफाट ३५ रनमा अविजित रहदा एलेक्स थोम्पसन २१ रनमा अविजित छन्।
नेपालका लागि सोमपाल कामी, सन्दीप लामिछाने र शरद भेषवाकरले २–२ विकेट लिए। अब बिहिबार पुनः एमसीसीले सोही योगफलबाट ब्याटिङ थाल्नेछ। यसै खेलबाट पहिलो श्रेणीको क्रिकेटमा नेपालका शरद भेषावकर र सोमपाल कामीबाहेक ९ जना खेलाडीले प्रथम श्रेणी क्रिकेटमा डेब्यू गरेका छन्।
नेपालले १४ वर्षपछि बुधबार प्रथम श्रेणीको क्रिकेटमा पुनरागमन गरेको हो। सन् २००५ पछि नेपालले त्रिवि क्रिकेट मैदानमा बुधबार विश्व प्रशिद्ध क्लब मेरिलेबन क्रिकेट क्लब(एमसीसी)सँग प्रथम श्रेणीको क्रिकेट खेलेको हो। राष्ट्रिय क्रिकेट टोलीका कप्तान ज्ञानेन्द्र मल्लले पनि यसै खेलबाट प्रथम श्रेणीको क्रिकेटमा डेब्यू गरे।
ज्ञानेन्द्रसँगै टोलीका ९ सदस्यले पहिलोपटक सेतो ड्रेशमा रातो बलसँग प्रथम श्रेणीको क्रिकेट खेले। टोलीमा रहेका शरद भेषावकर र सोमपाल कामीले मात्रै प्रथम श्रेणी क्रिकेट खेलेका थिए। गतवर्ष एकदिवसीय मान्यता पाएपछि एमसीसीले नेपालमा खेल्ने तीन दिवसीय खेललाई आईसीसीले फस्ट क्लास क्रिकेटको मान्यता दिएको हो।
अन्तराष्ट्रिय क्रिकेट परिषद् (आईसीसी) ले टेष्ट मान्यता नपाएका राष्ट्रका लागि अन्तर महादेशीय कपको नाममा प्रथम श्रेणीको क्रिकेट सुरु गरेको थियो। सन् २००४ मा सुरु भएको यो प्रतियोगिताको नेपालले पहिलो पहिलो दुई संस्करण खेलेपनि त्यसपछि प्रतियोगितामा छनोट हुन सकेन।
सन् २००६ को आईसीसी अन्तर महादेशीय च्यालेन्ज कपमा नेपालले नामिबियाको मैदानमा बराबरी खेलेपछि कुनै पनि आईसीसीको पहिलो श्रेणीको क्रिकेट खेलेको छैन।
एमसीसीले यसअघिको नेपाल भ्रमणको पहिलो एकदिवसीय खेलमा यू–१९ टोलीलाई ५ विकेटले पराजित गर्दै नेपाल भ्रमणको सुरुवात गरेको थियो। लगत्तै अर्कोदिन भएको खेलमा नेपाली राष्ट्रिय टोलीले एमसीसी ५ विकेटले पराजित गर्यो।
तीनदिन प्रथम श्रेणीको क्रिकेट खेलेपछि एमसीसीको टोली पोखरा भ्रमणमा निस्कनेछ। पोखरामा पोखरा–११ र मुख्यमन्त्री–११ सँग मैत्रीपूर्ण खेल खेल्ने एमसीसीको कार्यक्रम छ। एमसीसी फाउन्डेशनले विकासिल देशहरुमा भ्रमण गर्ने उदेश्यसहित यो टूरको आयोजना गरेको हो।
प्रतिक्रिया