प्रदेश २ मा कोरोनाबाट थप दुईको मृत्यु, ५९७ जना डिस्चार्ज

प्रदेश २ मा कोरोना संक्रमणबाट थप दुई जनाको मृत्यु भएको छ। बुधबार कोरोना भाइरसको संक्रमणबाट सप्तरीको अग्निसाई कृष्णासवरन नगरपालिका ४ का ३९ वर्षीय पुरुषको मृत्यु भएको हो।

यस्तै सर्लाहीको वरहथवा नगरपालिका ६ का ६६ वर्षीय पुरुषको कोरोना भाइरसको संक्रमणबाट मृत्यु भएको सामाजिक विकास मन्त्रालयकावरिष्ट चिकित्सक डा.कमलेश यादवले जानकारी दिए।

यो सँगै प्रदेश २ मा कोरोना संक्रमणबाट मृत्यु हुनेको संख्या १३३ पुगेको छ।

यस्तै पछिल्लो २४ घण्टामा प्रदेश २ मा ५ सय ९७ जना संक्रमित कोरोना मुक्त भएका छन्। कोरोना मुक्त हुनेमा ५०९ जना पुरुष र ८८ जना महिला रहेको मन्त्रालयले जनाएको छ। बुधबार ४९ जना कोरोना संक्रमित थपिएका छन्।