युनिकोड
ईश्वरी भुजेल हत्याका अभियुक्त उनका पति नेपाली ब्रो भन्ने कुमार थापा मगर र उनकी प्रेमिका भनिएकी प्रतीक्षा आचार्यलाई पुर्पक्षका लागि थुनामा पठाउन जिल्ला अदालत काठमाडौँले आदेश दिएको छ।
जिल्ला अदालत काठमाडौँका न्यायाधीश महेन्द्रबहादुर कार्कीको इजलासले बिहीबार थुनछेक आदेश गर्दै दुई जनालाई थुनामा पठाउने र दुईजनालाई धरौटीमा रिहा गर्न आदेश दिएको हो।
उनीहरूसँगै पक्राउ परेका कुमारका भाइ विक्रम थापा मगर र उनका साथी सुजन थापालाई जनही एक-एक लाख रुपैयाँ धरौटीमा रिहा गर्न आदेश भएको जिल्ला अदालत काठमाडौँका सूचना अधिकारी शिव खतिवडाले जानकारी दिए।
२०८३ जेठ २२ गते राति कुमारले चक्कु प्रहार गरेर ईश्वरीको हत्या गरेका थिए। ईश्वरी नेपाली सेनाकी जमदार हुन्। त्यसदिन उनी जागिरबाट घर फर्किंदै थिइन्। उनी नेपाली सेनाको सैनिक ब्यान्ड नारायणहिटीमा कार्यरत थिइन्।
ईश्वरी र कुमारको सम्बन्धविच्छेदको मुद्दा जिल्ला अदालतमा विचाराधीन छ। ईश्वरीले सम्बन्धविच्छेदको माग गर्दै मुद्दा दायर गरे पनि कुमारले मानेका थिएनन्। जिल्ला अदालत काठमाडौँले त्यसलाई मेलमिलापका लागि पठाइदिएको थियो। अदालतले मेलमिलापमा पठाएको दुई दिनपछि ईश्वरीको हत्या भएको थियो।
कुमार र ईश्वरीबिच केही वर्ष पहिलेदेखि नै विवाद देखिएको छ। प्रहरीका अनुसार विवादको कारण यही मुद्दाकी सहप्रतिवादी प्रतीक्षा आचार्य देखिएकी छन्। कुमार प्रतीक्षासँग प्रेम सम्बन्धमा थिए।
यही कारण कुमार र ईश्वरीको झगडा प्रहरी कार्यालयसम्म पुगेको थियो। कुमारले ईश्वरीलाई कुटपिट गर्नुका साथै मानसिक यातना दिएको प्रहरीको निष्कर्ष छ।
प्रहरी वृत्त बालाजुमा एक पटक र प्रहरी परिसर काठमाडौँमा एक पटक मिलापत्र कागज गराइएको थियो। मिलापत्रमा कुमारले प्रतीक्षालाई छाड्ने र सम्बन्धमा नरहने भनिएको थियो। तर कुमारले उनलाई छाडेका थिएनन्।
घटना हुनुभन्दा केही समय अगाडिसम्म उनले ईश्वरीलाई अदालतमा दायर मुद्दामा मिलापत्र गर्न दबाब दिइरहेका थिए। तर ईश्वरी त्यसका लागि तयार भएकी थिइनन्। यही कारण कुमारले ईश्वरीको हत्या गरेको निष्कर्षमा प्रहरी पुगेको छ।
बयानका क्रममा पनि कुमारले प्रतीक्षासँगको प्रेम सम्बन्ध र ईश्वरीको हत्या गर्ने योजनाबारे खुलासा गरेका छन्। त्यसदिन पनि सुरुमा कुमार घर पुगेका थिए। तर ईश्वरी घर पुगिसकेकी थिइनन्। त्यसपछि कुमार ईश्वरीको हत्या गर्न बाटो ढुकेर बसेका थिए।
प्रतीक्षा भने त्यतिबेला घटनास्थलमा थिइनन्। तर उनकै कारण घर झगडा भएको र पटकपटक मिलापत्र गर्दा पनि कुमारबाट अलग नभएको पाइएको छ। उनी कुमारको नुवाकोटस्थित घरमै गएर बसेको पनि खुलासा भएको छ।
प्रतीक्षासँगको सम्बन्धकै कारण कुमारले ईश्वरीको हत्या गरेको आरोप जाहेरीमा पनि लगाइएको छ। उनका भाइ विक्रम थापा मगरले ईश्वरीलाई तह लगाउन भन्दै उक्साएको आरोप छ।
त्यसका लागि उनले कति खर्च लाग्छ म दिन्छु भनेको पनि जाहेरीमा उल्लेख छ। उनले कुमार र प्रतीक्षाको अनैतिक सम्बन्ध बारे थाहा पाए पनि त्यसलाई सल्टाउनको सट्टा प्रश्रय दिएको जाहेरीमा आरोप लगाइएको छ।
पुजन थापा क्षेत्री धनेश्वर अटो मोबाइल्स प्रालिका सञ्चालक हुन्। उनले कुमार र प्रतीक्षालाई भेटघाट गराउने र कुमारलाई यो घटना घटाउने कार्यका लागि प्रोत्साहन गरेको आरोप छ। यो कसुरमा कुमारलाई जन्मकैदको सजाय माग गरिएको छ। अरु तीनजनालाई दुरुत्साहनको कसुरमा सजाय माग गरिएको छ।
यो कसुर स्थापित भए मुख्य आरोपितलाई हुने सजायको आधा सजाय हुने व्यवस्था छ। कुमार बाहेकका तीन जनालाई कुमारलाई हुनेभन्दा आधा कम सजाय माग गरिएको छ।
यो पनि,
प्रतीक्षासँगको प्रेमका कारण नेपाली ब्रोले पत्नी ईश्वरीको हत्या गरेको प्रहरीको निष्कर्ष
डिभोर्स र वैवाहिक बलात्कारको मुद्दा अदालतले मेलमिलापमा पठायो, २ दिनपछि नेपाली ब्रोले गरे ईश्वरीको हत्या
प्रतिक्रिया