बुधबार कोरोना संक्रमण पुष्टि भएका पर्साका १७ जना एउटै परिवारका रहेको पाइएको छ।
उनीहरु २१ गते संक्रमण भेटिएका पुरुषका परिवारकै सदस्यहरु रहेको प्रहरीले जनाएको छ।
सरसफाइको काम गर्ने ती पुरुषमा वैसाख २१ गते कोरोना संक्रमण पुष्टि भएको थियो।
उनमा संक्रमण देखिएपछि उनका परिवार र आफन्त गरी ३२ जनाको स्वाब संकलन गरिएको थियो। ती मध्ये १७ जनामा कोरोना संक्रमण पुष्टि भएको हो।
स्वाब संकलन गरेर उनीहरुलाई घरमै राखिएको थियो। अहिले कोरोना संक्रमण पुष्टि भएपछि नारायणी अस्पतालमा ल्याउने तयारी भइरहेको छ।
राष्ट्रिय जनस्वास्थ्य प्रयोगशालामा गरिएको परीक्षणमा ती १७ जनाको रिपोर्ट पोजिटिभ आएको हो।
बुधबार संक्रमण देखिएकामा दुई महिनाको शिशुदेखि ६६ वर्षका बृद्धसमेत रहेका छन्।
संक्रमितमध्ये ७ जना महिला र १० जना पुरुष रहेको स्वास्थ्य मन्त्रालयले जनाएको छ।
योसँगै नेपालमा कुल संक्रमितको संख्या ९९ पुगेको छ।
प्रतिक्रिया