अध्ययन, कामकाज तथा अन्य कारणले काठमाडौंमा रहेका कञ्चनपुरवासीलाई गृह जिल्ला ल्याउन भीमदत्तनगरबाट दिनहुँ सवारी (बस) पठाउने काम भइरहेको भए पनि सीमावर्ती भारतीय बजारमा लामो समयदेखि आश्रय लिइरहेका नेपाली मजदुरलाई स्वदेश ल्याउने विषय अझै किनारा लाग्न सकेको छैन।
काठमाडौंबाट कञ्चनपुर, कैलालीलगायतका जिल्लामा जान काठमाडौंमै रहेर प्रतिनिधिसभा सदस्यदेखि पूर्वमन्त्री, राजनीतिक दलका नेता र विद्यार्थी नेता अग्रसर रहेको देखिएका छन्। सामाजिक सञ्जालमा राहत वितरण र उद्धार गरी घर पठाउने विषयले चुनावी झझल्को दिए पनि झण्डै एक महिनादेखि घर आउन नपाएर सीमावर्ती भारतीय बजारका विद्यालयमा आश्रित नेपाली मजदुर घर ल्याउन जनप्रतिनिधिका साथै प्रदेश र स्थानीय सरकार गम्भीर भएको देखिँदैन।
काठमाडौंलगायत बाहिरबाट यहाँ आइरहेका नागरिकलाई १४ दिन क्वारेन्टाइन राखेपछि मात्रै होम क्वारेन्टाइनमा राख्न कञ्चनपुरको स्थानीय प्रशासनले स्थानीय तहलाई सचेत गराए पनि कार्यान्वयन नहुँदा कोरोना भाइरसको संक्रमण बढ्ने चिन्ता रहेको छ।
‘सीमापारि रहेकालाई यहाँ ल्याएर क्वारेन्टाइनको व्यवस्था रहे पनि आफ्ना नागरिकलाई यता ल्याउने विषयमा गम्भीर कोही पनि देखिँदैन’, सुरक्षा निकायका एक प्रमुखले भने, ‘सीमापारि रहेका मजदुरका विषयमा बोल्ने जनप्रतिनिधिसमेत यहाँ देखिएनन्।’
सर्वोच्च अदालतले समेत लकडाउनका कारण भारतीय सीमा क्षेत्रमा क्वारेन्टिन राखिएका नेपालीलाई घर फर्काउन अन्यथा भारतमै गास, बासको प्रबन्ध मिलाउन आदेश जारी गरे पनि सुनुवाइ भएको छैन। कञ्चनपुरका प्रमुख जिल्ला अधिकारीले काठमाडौंलगायत कुनै पनि ठाउँबाट मान्छे ओसार्न जिल्ला प्रशासन कार्यालयले पास उपलब्ध नगराएको बताए ।
‘बाहिरबाट आउनेको विवरण संकलन र तापक्रम मापन जिल्ला प्रशासनको पहलमा कञ्चनपुरको गजरौमा गर्दैछौं’, सहायक प्रमुख जिल्ला अधिकारी गोकर्णप्रसाद उपाध्यायले रासससित भने, ‘बाहिरबाट आउनेलाई सम्बन्धित स्थानीय तहले क्वारेन्टिनमा राख्नुपर्छ भनेर हामीले परिपत्रसमेत गरेका छौं।’ उनले केही स्थानमा क्वारेन्टिन राखिए पनि बाहिरबाट आउने अधिकांश घर फर्किरहेको सुन्नमा आएको बताए।
‘सरकारको नीतिअनुसार जो जहाँ छ त्यही बस्नुपर्ने हो’ सहायक प्रजिअ उपाध्यायले भने, ‘हामीले कहीँबाट पनि जिल्लामा मान्छे भित्र्याऊ भनेर स्वीकृत दिएका छैनौँ।’ काठमाडौं सवारी लिन गइरहेका बसलाई जिल्ला प्रशासनबाट स्वीकृत नभएको उनले बताए। ‘पहिलोपटक आएका ८६ जनाको गजरौलामा नमूना परीक्षणसमेत ग-यौँ’, उनले भने, ‘आउनेको क्रम बढेपछि त्यो पनि सम्भव भएन।’
उनले आइतबार साँझसम्म अन्य जिल्लाबाट ३८६ जना कञ्चनपुर भित्रिएको बताए। क्वारेन्टिनको व्यवस्थापन स्थानीय तहले गरेको भए पनि मान्छे राख्न गम्भीर नदेखिएको उनको भनाइ थियो। उनले भने, ‘हामीसित व्यवस्थापनका लागि साधन स्रोत नै उपलब्ध छैन।’
कञ्चनपुरको सीमावर्ती भारतीय बजार वनबासा, टनकपुरलगायतका क्षेत्रमा आश्रय लिइरहेका नेपालीलाई स्वदेश ल्याउन स्थानीय प्रशासनले समन्वय गरे पनि ल्याउने विषयमा दुवै देशका सरकारबीच कुरो नमिलेको उनले बताए।
‘हामीले केही दिनअघि मात्रै सीमापारि गएर स्थलगत अनुगमनबाट नेपालीको अवस्था बुझ्ने काम गरेका थियौँ’, उनले भने, ‘नेपालीको स्वास्थ्य अवस्था सामान्य र खान, बस्नको व्यवस्था राम्रो भए पनि उनीहरुले आफ्नै देशको क्वारेन्टिनमा बस्न चाहेका छन्।’ सीमापारि २५१ नेपाली रहेको बताउँदै उनले त्यहाँबाट ल्याउन सकिए भीमदत्तनगरको बैजनाथ स्कूलको क्वारेन्टिनमा राख्ने गृहकार्य भएको बताए।
सीमापारि रहेकालाई ल्याउने विषयमा स्थानीय प्रशासन केन्द्रको आदेश कुरिरहेको छ। कञ्चनपुरका २७ स्थानमा करिब ६०० भन्दा बढी श्ययाको क्वारेन्टिन स्थापना गरिएका भए पनि हालसम्म छ महिलासहित १६१ जना मात्रै बसिरहेका छन्। कञ्चनपुर उद्योग वाणिज्य संघका अध्यक्ष जंगबहादुर मल्लले सीमापारि रहेका नेपाली नागरिकलाई स्वदेश ल्याएर क्वारेन्टिनमा राख्ने दायित्व सरकारको भएको बताए।
‘यहाँ ल्याएर मात्रै भएन, सबैलाई उचित व्यवस्थापनका साथ क्वारेन्टिनमा राख्नु पनि प-यो”, अध्यक्ष मल्लले भने, ‘त्यो विषयमा कोही पनि गम्भीर भएको देखिँदैन।’
त्यसैगरी दुई दिनयता यहाँबाट सुदूरपश्चिमका पहाडी जिल्लामा समेत यात्रुबाहक बस सञ्चालन भइरहेका छन्। भीमदत्तनगरका समाजसेवी लीलाध्वज बस्नेतले सीमापारि रहेका नागरिक ल्याउन सरकार गम्भीर हुनुपर्नेमा जोड दिए।
‘चौध दिन भनेको ठाउँमा २५ दिन बस्दा स्वास्थ्य समस्या देखिएन भने सुरक्षा सतर्कता अपनाएर घर फर्काउन गम्भीर हुनुपर्छ’, बस्नतेले भने, ‘नागरिकको मानसिक तनावलाई पनि ख्याल गर्नुपर्छ।’ कञ्चनपुरको क्वारेन्टिनमा बसेका २९ जना भारतीय मजदूर स्वास्थ्य परीक्षणमा अवस्था सामान्य रहेपछि यहाँको महाकाली नदीमा निमार्णाधीन चार लेनको पुलमा ज्यालादारीमा लागेका छन्। रासस
प्रतिक्रिया