युनिकोड
ऊर्जा, जलश्रोत तथा सिंचाईमन्त्री दीपक खड्काले उद्योगहरुले प्रयोग गरेको विद्युतको महशुल तिर्नुपर्दैन भनेर सरकारले कहिल्यै नभनेको बताएका छन्।
विद्युत प्राधिकरणले प्रवाह गरेको विद्युत उद्योगधन्दाहरुमा प्रयोग भएको र महशुल नतिरेर थन्किएको अवस्था रहेको बताए।
नेपाल विद्युत प्राधिकरणको ४० औँ वार्षिकोत्सवका अवसरमा शुक्रबार प्राधिकरणमा कार्यरत कर्मचारीलाई दीर्घसेवा पदक, अवकाश पदक र अमर विद्युतकर्मीलाई सम्मान कार्यक्रममा बोल्दै मन्त्री खड्काले उद्योगधन्दाहरुले प्रयोग गरे जति विद्युतको महशुल तिर्नुपर्ने बताए।
‘हामीले प्रवाह गरेको विद्युत, उद्योगधन्दाहरुमा दिएको विद्युतको महशुल नतिरेर थन्किएको अवस्थामा छ,’ खड्काले भने, ‘त्यसरी सधैँ रही रहनु दुर्भाग्यपूर्ण हो। जति प्रयोग गरेको हो, त्यो बराबरको असुल गर्न सक्नुपर्छ। त्यो तपाईंहरुको होइन, विद्युत प्राधिकरणको काम हो। सरकारले कहिले पनि भनेको छैन, यो विद्युतको महशुल उठाउनु हुँदैन भनेर। सरकारले यति मात्रै भनेको छ-चाहे त्यो लाल आयोगको कुरा गर्नुस्, चाहे क्याबिनेट निर्णयको कुरा गर्नुस् वा मन्त्रालयको निर्णयको कुरा गर्नुस्, खालि के भनेको छ भने मान्छेलाई अन्याय हुन दिनु हुँदैन, जति प्रयोग गरेको हो, त्यतिको असुली गर्नुपर्दछ।’
उद्योगलाई निरुत्साहित गरेर नभइ न्यायोचित प्रक्रियाबाट काम गरेर अघि बढ्न जरुरी रहेको उनले बताए। टिओडी मिटरका आधारमा रकम असुल गर्ने उल्लेख गरिएको भन्दै टिओडी मिटर किन नराखेको भन्दै प्रश्न समेत गरे।
प्रतिक्रिया