युनिकोड
तत्कालीन सेन्चुरी कमर्सियल बैंकका पूर्वअध्यक्ष राजेश श्रेष्ठसहित ८ जना पक्राउ परेका छन्।
बैंकको ऋण प्रवाहका क्रममा अनियमितता गरेको आरोपमा प्रहरीको केन्द्रीय अनुसन्धान ब्यूरो (सीआईबी) ले पक्राउ गरेको हो।
पक्राउ परेका ८ जनामा राजेश श्रेष्ठसहित सुनिल कुमार न्यौपाने, प्राडा गीता प्रधान, रमेश कुमार निरौला, रणबहादुर श्रेष्ठ, राजेश कुमार दली, उमाकुमारी श्रेष्ठ र शिवगोपाल रिसाल रहेका छन्।
राजेशबाहेक ६ जना तत्कालीन सञ्चालक समिति सदस्य हुन् भने शिव गाेपाल रिसाल क्याट शाखाका प्रमुख हुन्।
यसअघि सो प्रकरणमा प्रहरीले बैंकका पूर्वसीईओ तुलसीराम गौतम र पूर्वसीईओ मनोज न्यौपानेसहित १० जनालाई पक्राउ गरिसकेको छ।
तत्कालीन सेञ्चुरी बैंकले देउराली बहुउद्देश्यीय सहकारीका अध्यक्ष रवीन्द्र चौलागाईं र उनका परिवारको लगानीका चारवटा कम्पनीमा ऋण लगानी गरेको थियो।
त्यसमा करिब ८० करोड रुपैयाँ मात्रै पर्ने धितो राख्दा चौलागाईंलाई सेञ्चुरीले २ अर्ब १२ करोड रुपैयाँ ऋण दिएको खुलेको थियो।
कमसल धितोमा अधिक कर्जा लगानी गरेको भेटिएपछि १० जना पक्राउ परेका थिए। यससम्बन्धी अनुसन्धान सीआईबीले गरिरहेको छ।
राष्ट्र बैंक र सीआईबीकाे अनुसन्धानमा थप रिपोर्ट प्राप्त भएपछि अहिले उक्त ८ जनालाई पक्राउ गरिएकाे सीआईबीका प्रवक्ता एसपी हाेबिन्द्र बाेगटीले बताए।
श्रेष्ठसहितलाई यसअघि पनि यही मुद्दामा पक्राउ गरेर हाजिरी जमानीमा छाडिएको थियाे।
सेन्चुरी कमर्सियल बैंक अहिले प्रभु बैंकमा गाभिएको छ।
प्रतिक्रिया