मकवानपुरमा भएको सुमो दुर्घटनामा मृत्यु भएकाको संख्या ५ पुगेको छ।
हेटौंडा सिस्नेरी-काठमाडौं सडकखण्डअन्तर्गत इन्द्रसरोबर गाउँपालिका वडा नम्बर ३, ओखरडाँडामा शुक्रबार दिउँसो दुर्घटना भएको हो।
दुर्घटनामा ३ जनाको घटनास्थलमै र २ जनाको उपचारका क्रममा मृत्यु भएको हो।
प्रहरीका अनुसार सिन्धुलीको दुधौली नगरपालिका ८ का ५८ वर्षीय नेत्रमान रुसाल (भुजेल), उनकी पत्नी ५२ वर्षीया भक्तकुमारी रुसाल र रौतहटको चन्द्रपुर नगरपालिका ९ का केदार तिमल्सिनाको घटनास्थलमै मृत्यु भएको हो।
यस्तै दुर्घटनामा परी गम्भीर घाइते भएका रौतहटको चन्द्रपुर नगरपालिका ९ का २१ वर्षीय मनिष विक र सोही ठेगानाका २० वर्षीया सिर्जना विकको उपचारका क्रममा मृत्यु भएको हो। काठमाडौंस्थित मनमोहन अस्पतालमा मनिष र वयोधा अस्पतालमा सिर्जनाको मृत्यु भएको मकवानपुर जिल्ला प्रहरी कार्यालयले जानकारी दिएको छ।
प्रहरीका अनुसार दुर्घटनामा परी सुमोमा सवार ४ जना घाइते भएका छन्। सुमोका चालक हेटौंडा उपमहानगरपालिका १७ का २८ वर्षीय अनिल विक, सर्लाहीकाे बागमती नगरपालिका ३ का २७ वर्षीय रन्जित रिजाल, रौतहटकै माधवनारायण नगरपालिका ५ का ५२ वर्षीय जय साह र रौतहटकै गरुडा नगरपालिका ५ का ३० वर्षीय नन्दकिशोर साह घाइते भएका हुन्।
सुमो चालक विक र नन्दकिशोर साहको मेडिसिटी अस्पतालमा तथा जैसा साह र रिजालको वयोधा अस्पतालमा उपचार भइरहेको छ।
सुमो अनियन्त्रित भई सडकबाट दुई मिटर तल खसेकाे हाे। मृतकको शव पाेस्टमार्टमका लागि त्रिवि शिक्षण अस्पताल काठमाडौं ल्याइएकाे छ।
प्रतिक्रिया