युनिकोड
प्रतिनिधिसभा सदस्य निर्वाचनको प्रत्यक्षतर्फ प्रधानमन्त्रीसहित वर्तमान सरकारका ६ मन्त्री निर्वाचित भएका छन्। निर्वाचन आयोगबाट प्राप्त विवरणअनुसार हालसम्म ५ मन्त्री पराजित भएका छन् भने ३ मन्त्री उम्मेदवार बनेको स्थानमा मतगणना जारी छ।
प्रधानमन्त्री शेरबहादुर देउवा डडेलधुरा क्षेत्र नं १ बाट १२ हजार ४३२ मतान्तरसहित विजयी भएका हुन्। उनले २५ हजार ५३४ मत प्राप्त गरे। निकटम् प्रतिद्वन्द्वी स्वन्तन्त्र उम्मेदवार सागर ढकालले १२ हजार ४२ मत प्राप्त गरे।
श्रम रोजगार तथा सामाजिक सुरक्षामन्त्री शेरबहादुर कुँवर अछाम निर्वाचन क्षेत्र नं १ बाट १९ हजार ५३४ मतसहित विजयी भए। उनले एमालेका झपट बोहोरालाई ४ हजार ४८९ मतान्तरले पराजित गरे। उद्योग, वाणिज्य तथा आपूर्तिमन्त्री दिलेन्द्रप्रसाद बडू २८ हजार ५१५ मतसहित दार्चुला क्षेत्र नं १ बाट विजयी भए। उनका निकटम् प्रतिद्वन्द्वी एमालेका गणेशसिंह ठगुन्नाले २६ हजार ३८१ मत प्राप्त गरे।
अर्थमन्त्री जनार्दन शर्मा रुकुम पश्चिम क्षेत्र नं १ बाट निर्वाचित भए। उनले ३९ हजार ५४९ मत प्राप्त गरे। सहरी विकास मन्त्री मेटमणि चौधरी दाङ निर्वाचन क्षेत्र नं १ बाट ५ हजार ८३ मतान्तरसहित विजयी भएका छन्। उनले एमालेका शान्ता चौधरीलाई पराजित गरे। शिक्षा, विज्ञान तथा प्रविधिमन्त्री देवेन्द्र पौडेल बागलुङ २ बाट २४ हजार सात सय ७९ मतसहित विजयी भए।
गत आइतबार सम्पन्न निर्वाचनको प्रत्यक्षतर्फको मतगणना केही स्थानमा अझै जारी छ। परराष्ट्रमन्त्री डा. नारायण खड्काले उदयपुर क्षेत्र नं १ मा १४ हजार दुई सय ४१ मतसहित अग्रता कायम गरिराखेका छन्। हालसम्म गृहमन्त्री बालकृष्ण खाँण र सञ्चार तथा सूचनाप्रविधि मन्त्री ज्ञानेन्द्रबहादुर कार्की झिनो मतान्तरले पछाडि छन्।
रुपन्देही ३ बाट उम्मेदवार बनेका गृहमन्त्री खाँणले २९ हजार २५५ मत प्राप्त गर्दा राप्रपाका उम्मेदवार दीपक बोहोराले ३० हजार ५७७ मत प्राप्त गरेका छन्। यस्तै, सुनसरी ४ बाट उम्मेदवार बनेका सञ्चारमन्त्री कार्की १०१ मतसहित पछाडि छन्। मन्त्री कार्कीले १९ हजार ७०९ मत प्राप्त गर्दा एमालेका जगदीशप्रसाद कुसियतले १९ हजार ८१० मत प्राप्त गरेका छन्।
यसपटकको निर्वाचनमा पाँच मन्त्रीले पराजय बेहोर्नु परेको छ। ऊर्जा, जलस्रोत तथा सिँचाइमन्त्री पम्फा भुसाल, खानेपानी मन्त्री उमाकान्त चौधरी, युवा तथा खेलकूद मन्त्री महेश्वरराज गहतराज, संस्कृति, पर्यटन तथा नागरिक उडड्यनमन्त्री जीवनराम श्रेष्ठ र प्रधानमन्त्री तथा मन्त्रिपरिषद्को कार्यालयका राज्यमन्त्री उमेश श्रेष्ठ निर्वाचनमा पराजित भएका छन्। रासस
प्रतिक्रिया