युनिकोड
बिहीबार अमेरिकाका नयाँ विदेशमन्त्री एन्टोनी ब्लिन्कनले दक्षिण चीन सागरमा चिनियाँ दाबीलाई अमेरिकाले अस्वीकार गर्ने बताए।
उनले उक्त क्षेत्रमा युद्ध अथवा आक्रमण भएमा अमेरिकाले फिलिपिन्सलाई साथ दिने पनि प्रतिवद्धता जनाएका छन्।
उनले भनेका छन्,‘खुला इन्डो–प्रशान्त क्षेत्रको लागि अमेरिका र फिलिपिन्सको सम्बन्ध महत्वपूर्ण हुनेछ।’
ब्लिन्कनले फिलिपिन्सका विदेशमन्त्री तियोदोरो लोकसिनसँग टेलिफोनवार्तामा आपसी रक्षा सन्धि हुनुपर्नेमा पनि जोड दिएको साउथ चाइना मर्निङ पोस्टले जनाएको छ।
ट्रम्प सत्तामा हुँदा अमेरिका र चीनबीच विभिन्न विषयमा विवाद भएका थिए। त्योमध्ये एउटा थियो दक्षिण चीन सागरको विषय।
बाइडेन राष्ट्रपति बनेपछि सम्बन्ध सुमधुर हुने अनुमानका बिच अमेरिका फेरि चीनप्रति आक्रामक देखिएको हो।
चीनले दक्षिण चीन सागर आफ्नो भएको दाबी गर्दछ। चीनले दाबी गर्ने यस सागरबाट वर्षेनी खरबौं डलरको कारोबार हुने गर्दछ। यो जल व्यापारको प्रमुख मार्ग हो।
चीनले यस विवादित जलक्षेत्रमा कृत्रिम टापुको निर्माण गरेर सेना तथा हतियारहरु तैनाथ गरेको छ।
तर दक्षिण चीन सागर आफ्नो भएको दाबी गर्ने अन्य मुलुकहरुले चीनको यस कार्यको विरोध गरेका छन्।
ब्रुनाइ, मलेसिया, फिलिपिन्स, ताइवान तथा भियतनामले पनि यस सागर आफ्नो भएको दाबी गर्दछन्।
अमेरिकाले आफ्ना सहयोगी राष्ट्रको सुरक्षाको लागि भन्दै यस विवादित जल क्षेत्रमा सैन्य अभ्यास गर्दै आएको छ।
चीनले अमेरिका यस क्षेत्रको दाबीकर्ता नभएको र उसले यस क्षेत्रमा सैन्य अभ्यास गर्नु अन्तर्राष्ट्रिय कानुनको उल्लंघन भएको बताउँदै आएको छ।
तर दाबीकर्ता राष्ट्रले अमेरिकाको उपस्थितीलाई स्वागत गरेको अवस्था छ।
अन्तर्राष्ट्रिय अदालतले पनि सन् २०१६ मा दक्षिण चीन सागरलाई चीनले दाबी गर्नु अवैधानिक र आधारहीन कार्य भएको बताएको थियो।
दक्षिण चीन सागरलाई दाबी गर्ने चीनबाहेकका राष्ट्रहरु साथै अमेरिका, जापान, अस्ट्रेलियाले चीनले अन्तर्राष्ट्रिय अदालतको फैसला मान्नुपर्ने बताएका छन्।
चीनले भने दक्षिण चीन सागरको विषय आन्तरिक मामिला भएकाले यस विषयमा हस्तक्षेप नगर्न अमेरिकालाई चेतावनी दिँदै आएको छ। एससीएमपी
प्रतिक्रिया