युनिकोड
निर्वाचन आयोगले समानुपातिक निर्वाचन प्रणालीबाट निर्वाचित सांसदलाई बिहीबार प्रमाण पत्र दिने भएको छ।
बिहीबार (२०८२ चैत ५ गते) बिहान ११ः३० बजे आयोगको प्राङ्गण कान्तिपथ काठमाडौँमा समानुपातिक प्रणालीबाट निर्वाचित सांसदहरूले निर्वाचित भएको प्रमाण पत्र ग्रहण गर्ने कार्यक्रम रहेको आयोगदले जनाएको छ।
आयोगले राजनीतिक दलहरूबाट छनोट भई आएका उम्मेदवारको नामावली सार्वजनिक गर्दै उनीहरू निर्वाचित भएको घोषणा गरिसकेको छ। गत फागुन २१ गते भएको निर्वाचनमा ६ वटा राजनीतिक दलले राष्ट्रिय दलको मान्यता पाएका छन्।
प्रमाणपत्र लिन आउँदा उम्मेदवारले सक्कल नागरिकता वा राष्ट्रिय परिचयपत्र र दुई प्रति पासपोर्ट साइजको फोटोसहितको विवरण आजै उपलब्ध गराउन आयोगले आग्रह गरेको छ।
समानुपातिकतर्फ राष्ट्रिय स्वतन्त्र पार्टीले ५७, नेपाली कांग्रेसले २०, नेकपा एमालेले १६, नेकपाले ९, श्रम संस्कृति पार्टीले ४ र राष्ट्रिय प्रजातन्त्र पार्टीले ४ सिट प्राप्त गरेका छन्।
२७५ सदस्यीय प्रतिनिधिसभामा प्रत्यक्षबाट १६५ र समानुपातिकबाट ११० जना निर्वाचित हुने संवैधानिक व्यवस्था छ।
समानुपातिकतर्फका सांसदलाई प्रमाणपत्र वितरण गरेसँगै यसपटकको निर्वाचन प्रक्रियाले पूर्णता पाउने आयोगले जनाएको छ।
प्रतिक्रिया