युनिकोड
जनता समाजवादी पार्टी (जसपा) नेपालका अध्यक्ष उपेन्द्र यादवले मुलुकको वर्तमान राजनीतिक गतिरोध अन्त्यका लागि संविधान संशोधन अनिवार्य रहेको बताएका छन्। रूपन्देहीको भैरहवामा शनिबार आयोजित पत्रकार सम्मेलनमा बोल्दै यादवले वर्तमान संवैधानिक व्यवस्थाले उत्पीडित समुदायको आकांक्षा सम्बोधन गर्न नसकेको दाबी गरेका हुन्।
अध्यक्ष यादवले वर्तमान संविधानले मधेशी, जनजाति, दलित तथा सीमान्तकृत समुदायका मुद्दालाई पूर्ण रूपमा नसमेटेको उल्लेख गर्दै भने, “वर्तमान संविधानमा रहेका त्रुटिहरू नसच्याएसम्म संघीयताको मर्म अनुसार राज्यको पुनर्संरचना हुन सक्दैन। विशेषगरी पहिचानका आधारमा प्रदेशको सीमाङ्कन र अधिकारको बाँडफाँटमा पुनर्विचार आवश्यक छ।”
निर्वाचन आइरहँदा पनि जसपाले संविधान संशोधनलाई राजनीतिक एजेन्डा बनाइरहेको हो।
जसपा नेपालका अध्यक्ष उपेन्द्र यादवले शासकीय स्वरूपमा परिवर्तनको माग गर्दै प्रत्यक्ष निर्वाचित कार्यकारी राष्ट्रपति र पूर्ण समानुपातिक निर्वाचन प्रणालीको वकालत बताए। “अहिलेको मिश्रित निर्वाचन प्रणालीले कुनै पनि दलको स्पष्ट बहुमत नआउने र अस्थिर सरकार बनिरहने अवस्था सिर्जना गरेको छ,” सोमबार उनले आरोप लगाए, “यसले भ्रष्टाचार र राजनीतिक विकृति मात्रै निम्त्याएको छ।”
सोही अवसरमा उनले राष्ट्रिय गौरवको आयोजना गौतम बुद्ध अन्तर्राष्ट्रिय विमानस्थलको बिजोगप्रति चिन्ता व्यक्त गरे। अर्बौँको लगानी भएको विमानस्थल पूर्ण क्षमतामा सञ्चालन गर्न सरकारले कूटनीतिक र प्राविधिक पहल नगरेको उनको गुनासो थियो। जसपा मधेशको समस्या बुझ्ने र ती मुद्दामा अडिग रहने एक मात्र शक्ति भएको दाबी गर्दै उनले अधिकार प्राप्तिको लडाइँ जारी रहने बताए।
प्रतिक्रिया