महाधिवेशनबारे कांग्रेस बैठक अनिर्णीत, गगन थापा भन्छन्-विशेष महाधिवेशन निर्विकल्प

लामो समय बसेर पनि नेपाली कांग्रेस केन्द्रीय कार्यसमितिको बैठक पार्टीको महाधिवेशनबारे ठोस निर्णय गर्न असफल बनेको छ। शनिबार सानेपामा समापन भएको बैठकले यसबारे कुनै निर्णय लिन नसकेको महामन्त्री गगन थापाले बताए। 

यद्यपि, विशेष महाधिवेशनमा जानै पर्ने जोड थापाको छ। उनले नयाँ नेतृत्वले नै नयाँ नीतिका साथ अघि बढाउन सक्ने जिकिर गरे।

‘नेपाली कांग्रेसले आजका निर्णयहरुको भारी बोकेर शिर अग्लो बनाएर गर्वका साथ हिँड्न अधिवेशन गर्नैपर्छ,’ उनले भने, ‘आज गरेको निर्णयलाई अधिवेशनबाट आएको नयाँ नेतृत्वले नै नयाँ नीतिका साथ अघि बढाउन सक्छ।’

‘यो अधिवेशन निर्वाचनअघि अनिवार्य गर्नैपर्छ। आवधिक अधिवेशन गर्नुपर्छ। अब निर्विकल्प कुरा भनेको विशेष महाधिवेशन हो। मंसिरको २७, २८ गतेतिर विशेष अधिवेशन गर्नुपर्छ,’ थापाले थपे।