विकल्प प्रयोग गरेर भए पनि अध्यादेश पारित गर्छौँ : महासचिव पोखरेल

नेकपा एमालेका महासचिव शंकर पोखरेलले सरकारले ल्याएको अध्यादेशको विरोध गरेर पारित हुनबाट नरोकिने बताएका छन्।  

शुक्रबार नेकपा एमालेको पार्टी केन्द्रीय कार्यालय च्यासलमा आयोजित नेपालका लागि आइसिटी आधारित उद्यमशिलताः आर्थिक समृद्धिको नयाँ बाटो विषयक अन्तरक्रिया कार्यक्रमलाई सम्बोधन गर्दै उनले यस्तो बताएका हुन्। 

उनले सरकारले ल्याएको अध्यादेश देशको अर्थतन्त्र चलायमान बनाउने र उद्योग क्षेत्रलाई प्रवर्द्धन गर्ने हिसाबले ल्याएको बताए।  

उनले दुई प्रमुख राजनीतिक दलले सचेततापूर्वक अध्यादेश ल्याएको उल्लेख गर्दै पारित गर्ने अनेक विकल्पहरू रहेको बताए। 

‘अहिले सरकारले जुन हिसाबले अध्यादेशका माध्यमबाट यो क्षेत्रलाई सम्बोधन गर्ने कोशिस गरेको छ। अब अध्यादेशको विरोध भयो भन्ने बित्तिकै त्यो कोशिस असफल हुन्छ भन्ने नठान्नुहोला,' उनले भने, 'किनकी यो प्रमुख पार्टीहरूले सचेततापूर्वक ल्याएको काम हो। त्यसअर्थमा हामी त्यसलाई जसरी पनि टुंग्याउँछौँ। कसैले विरोध गर्‍यो भनेर त्यो विरोधले रोकिनेवाला छैन। अनेक विकल्पहरू छन्।'

विकल्प प्रयोग गरेर भए पनि अध्यादेश पारित गरेरै छोड्ने उनको भनाइ छ।
  
'विकल्प प्रयोग गरेर भए पनि हामी त्यसलाई राज्यको कानुनमा ढालिहाल्छौँ। यद्यपि अध्यादेश आफैँमा कानुन हो। प्रयोगमा आइसकेको छ। अब नियमावली बनेको छैन भन्नेखालको कुरा पनि हामीले त नियमावली आवश्यक पर्ने चिज बनाइहालौँ भनेको छौँ। सायद बनाइसकेको होला जस्तो लाग्छ,' उनले भने, 'आवश्यक नपर्नेका लागि कानून नै कार्यान्वयन हुन्छ। नियम बनाएर गर्ने भन्ने चिजका लागि मात्रै नियमावली हो। कानुनले नै स्पष्ट तोकेको चिजमा नियमावली आवश्यक पर्दैन। त्यो स्वतः कार्यान्वयनमा जान्छ। तर कतै त्यो नियमावली आवश्यक पर्ने चिज रहेछ भने त्यो पनि हामीले छिटो गर्न सकिन्छ।’