शपथपछि सुहाङले भने- यो ऐतिहासिक क्षण हो, भावुक भएको छु

नवनिर्वाचित प्रतिनिधि सभा सदस्य सुहाङ नेम्बाङले आफूले पदको शपथ खाएको दिनलाई ऐतिहासिक क्षण भनेका छन्। 

आफूले ठूलो अवसर पाएको उल्लेख गर्दै आफूलाई भावुक पनि बनाएको उनले बताए। 

‘सबभन्दा सुरुमा यो एकदमै ऐतिहासिक क्षण हो। यहाँ उपस्थित भएर तपाईंहरू समक्ष आफ्ना कुरा राखिरहन पाउँदा भावुक पनि भएको छ’, शपथलगत्तै पत्रकारहरूसँग उनले भने, ‘मलाइृ हर्षित बनाएको छ। ठूलो अवसर प्राप्त भएको छ।’

इलामेली जनताको हितमा काम गर्न पाउने कुराले निकै खुसी लागेको उनले बताए। 

उपनिर्वाचनमार्फत इलाम क्षेत्र नम्बर २ बाट प्रतिनिधि सभा सदस्यमा निर्वाचित सुहाङ नेम्बाङले पदको शपथ लिएका छन्।

सङ्घीय संसद् सचिवालयद्वारा सिंहदरबारमा आयोजित कार्यक्रममा सभामुख देवराज घिमिरेले उनलाई शपथ खुवाएका हुन्। शपथपछि उनलाई सभामुख घिमिरेले प्रतिनिधि सभा सदस्यको लोगो लगाइदिएका छन्।

सो अवसरमा सचिवालयका कर्मचारीहरुले सांसद नेम्वाङलाई नेपालको संविधान, ऐन/नियमका सामग्री प्रदान गरेका थिए।

कार्यक्रममा उपसभामुख इन्दिरा राना, कानुन, न्याय तथा संसदीय मामिलामन्त्री पदम गिरी, रक्षामन्त्री हरिप्रसाद उप्रेती, विभिन्न राजनीतिक दलका प्रमुख सचेतक, संसद् सचिवालयका महासचिव पदमप्रसाद पाण्डेयलगायत  उपस्थित थिए। 

सुहाङ नेकपा एमालेका तत्कालीन उपाध्यक्ष सुवास नेम्बाङका छोरा हुन्। इलाम २ बाट निर्वाचित सुवासको निधन भएपछि त्यहाँ उपनिर्वाचन भएको हो। उनी एमालेकै तर्फबाट निर्वाचित भएका हुन्।

चुनावमा निकटतम प्रतिस्पर्धी नेपाली कांग्रेसका उम्मेदवार डम्बर खड्कालाई ५ हजार ८३० मतान्तरले पछि पार्दै सुहाङले २७ हजार ७ सय ७२ मत ल्याएका थिए।