युनिकोड
नागरिक उन्मुक्ति पार्टीका नेता तथा प्रतिनिधिसभा सदस्य अरुण चौधरीले राजनीति प्रतिशोध साँध्न आफूलाई कारागारमा राखिएको प्रतिक्रिया दिएका छन्।
कैलाली कारागारबाट रिहा हुने क्रममा सञ्चारकर्मीसँग कुरा गर्दै उनले राजनीति प्रतिशोध साँध्न आफूलाई कारागारमा राखिएको बताए।
‘जुन हिसाबले म भित्र आएँ त्यो राजनीतिक प्रतिशोध भएको देखिन्छ, ’ चौधरीले भने। भर्खरै उदाउन लागेको दललाई खुम्च्याउन खोज्ने परिपाटी नेपाली राजनीतिमा राम्रो नदेखिएको पनि उनले बताए।
‘राजनीतिक प्रतिशोध लिएको जस्तो। एउटा राइज भएको पार्टी, अब सानो पार्टी छ। सानो दल छ,’ चौधरीले भने, ‘यो जसरी उठी रहेको छ त्यसरी नै खुम्च्याइदिउँ भन्ने जुन परिपाटी देखियो त्यो नेपालको राजनीतिमा त्यति राम्रो देखिएको छैन।’
कारागार बसाईंका क्रममा धेरै कुरा सिकेको र नेपालको कानुन परिमार्जन गर्नुपर्ने पनि उनले सुनाए।
‘कारागारको बसाइ छ, जेलबन्दीको कुरा छ, त्यसले धेरै कुरा सिकाएको छ,’ चौधरीले भने, ‘कानुनमा अझै पनि धेरै कुरा परिमार्जन गर्नु पर्ने जस्तो देखिन्छ।’
प्रजातन्त्र दिवसको अवसरमा राष्ट्रपति विद्यादेवी भण्डारीले दिएको आममाफी अनुसार सांसद चौधरी रिहा भएका हुन्।
उनीसहित कैलाली कारागारबाट चार जना रिहा भएका छन्।
राष्ट्रपति विद्यादेवी भण्डारीले प्रजातन्त्र दिवसको उपलक्ष्यमा ३९५ जना कैदीको सजाय माफी गरिदिएकी हुन्।
प्रतिक्रिया