युनिकोड
केही समयअघिसम्म काठमाडौँ महानगरका मेयर बालेन्द्र शाह र धरान उपमहानगरपालिकाका मेयर हर्क साम्पाङ सामाजिक सञ्जालमा एकअर्काको विरोध गरेर लेखिरहेका हुन्थे। दुवै जना स्वतन्त्र उम्मेदवारीबाट मेयर बनेका भए पनि एकअर्काका कुरा काटिरहेका हुन्थे।
खासगरी धरान उपमहानगरपालिकाको मेयर पदमा निर्वाचित भएपछि काठमाडौँ आउँदा आफूलाई ‘भाउ नदिएको’ झोँकमा बालेन्द्रविरुद्ध हर्क सामाजिक सञ्जालमा नानाभाँती लेख्थे। अनि बालेन्द्रले पनि जवाफ फर्काउँथे।
तर पछिल्लो समय यी दुईजनाबीच मित्रता बढ्दै गएको पाइएको छ। अहिले उनीहरूले सामाजिक सञ्जालमा एकअर्काले लेखेका कुरामा समर्थन जनाउने र सेयर गरिदिने गरेका हुन्।
यसै क्रममा पछिल्लो समय मेयर बालेन्द्रले अमेरिकी राजदूतसँग भेटवार्ता गर्दा एमालेका नेता भीम रावलले परराष्ट्र मन्त्रालयको अनुमति लिएर भेट गरेको हो कि नलिईकन भनेर सामाजिक सञ्जालमार्फत प्रश्न उठाए। त्यसमा बालेन्द्रले कडा जवाफ दिए भने यसपछि पनि रावलले उनीप्रति आक्रोश पोखेका छन्।
यसैबीच धरानका मेयर हर्कले सोही प्रसंगप्रति लक्षित ट्विट गर्दै बालेन्द्रको पक्ष लिएका हुन्।
शनिबार बिहानै उनले लेखेका छन्, ‘स्वतन्त्र मेयर बालेन शाहलाई जुन किसिमले घेराबन्दीमा पारिएको छ, त्यो निन्दनीय छ। कथाले माग्यो अब। स्वतन्त्रहरू एक बन्ने बेला आएको छ। यो बेला अरूले साथ दिऊन्, नदिऊन् तर मेरो साथ रहनेछ।’
प्रतिक्रिया