सैनिक अस्पतालमा मिर्गौला उपचारबारे सेना र महानगरबीच सहमति

नेपाली सेनाको वीरेन्द्र अस्पताल, छाउनीमा काठमाडौं महानगरका नागरिकले मृगौला उपचार सेवा पाउने भएका छन्।

नागरिकलाई मृगौला उपचारसम्बन्धी सेवा उपलब्ध गराउने समझदारी पत्रमा बुधबार हस्ताक्षर भएको छ। प्रधानसेनापति पूर्णचन्द्र थापा र काठमाडौं महानगरपालिकाका मेयर विद्यासुन्दर शाक्यले समझदारी पत्रमा हस्ताक्षर गरेका हुन्।

सहमति अनुसार महागनरपालिकाबाट सिफारिस भएमा नागरिक र कर्मचारीले सैनिक अस्पतालमा सेवा पाउने छन्। यसअघि सैनिक अस्पतालमा सर्वसाधारणले दुर्घटना भएको अवस्थामा आकस्मिक सेवा मात्रै पाउँदै आएका थिए ।

समझदारी भएपछि शाक्यले यसलाई ऐतिहासिक कार्यको थालनी भनेका छन्। सेनाले सैनिक र महानगरवासीबीच रहेको सम्बन्धीलाई थप प्रगाढ र सुमधुर बनाउन यो समझदारीले सहयोग गर्ने विश्वास व्यक्त गरिएको जनाएको छ।