ग्रान्डीले लापरबाही गरेको प्रमाणित, न्यौपाने दम्पतीलाई तीन महिनापछि न्याय

ग्रान्डी अन्तर्राष्ट्रिय अस्पतालले सञ्जीवचन्द्र न्यौपाने र एकता घिमिरेको नवजात शिशु (छोरा) को उपचारमा चरम लापरबाही गरी कल्पनै गर्न नसकिने पीडा दिएको तीन महिनापछि प्रमाणित भएको छ।

यस सम्बन्धमा अनुसन्धान गर्न नेपाल मेडिकल काउन्सिलको ०७६ असार ७ गतेको पूर्ण बैठकद्वारा प्राडा गणेश राईको नेतृत्वमा गठित विज्ञ टोलीले हालै बुझाएको प्रतिवेदनमा उक्त शिशुको उपचारमा चिकित्सकको टिमबाट धेरै कमी–कमजोरी भएको देखाएको खबर समाचारपत्र दैनिकमा भगवती तिमल्सिनाले लेखेकी छन्।

प्रतिवेदनमा उपचारका क्रममा शिशुलाई एकैपटक अत्यधिक मात्रामा पारासिटामोल दिइएको, मस्तिष्कको भर्टिकल र सीवाईएसटीको आकार–प्रकारबारे रेडियोलोजिस्ट र उपचाररत न्युरो सर्जन चिकित्सकका बीच बुझाइको अत्यन्तै अभाव देखिएको र बिरामी पक्षलाई पर्याप्त र यथार्थ जानकारी नदिइएको उल्लेख छ।

जिम्मेवार चिकित्सकहरूबीचमै उपचारमा संलग्न विभिन्न प्रक्रिया र त्यसबाट सिर्जित अवस्थाको विषयमा बुझाईमा एकरूपता नदेखिनुले चिकित्सकहरू आपसी समन्वय, काउन्सिलिङ, ब्रिफिङमा अत्यन्तै चुकेको निष्कर्ष निकालिएको प्रतिवेदनले खुलाएको छ।

प्रतिवेदनको निष्कर्षमा भनिएको छ– ‘शिशुको मस्तिष्कको भिडियो एक्सरे गरेपश्चात रेडियोलोजिस्टहरूका सुझावअनुसार सिटी अथवा एमआरआई गर्न चिकित्सकले ढिलाइ गरेको देखियो। बिरामीको उपचार गरिरहँदा पनि सुधार नआएपछि रोगको अवस्था र जटिलताका बारे समयमै पहिचान गर्न बिरामीको सिटी वा एमआरआई अत्यन्तै जरुरी पर्दछ। जुन समयमा गरिएको देखिएन। जसले गर्दा रोगको जटिलताको समयमै पहिचान गर्न नसक्नु यो घटनाको मुख्य कमजोरी हो।’

गत असार १२ गते ग्रान्डी अस्पतालमा सञ्जीव न्यौपाने र एकता घिमिरेको बच्चाको उपचारका क्रममा लापरबाही गरिएको भनी नेपाल मेडिकल काउन्सिलसमक्ष छानबिनका लागि निवेदन पेस भएको थियो।

सोही निवेदनका विषयमा काउन्सिलले यही असोज १० गते अन्तिम निष्कर्षसहितको प्रतिवेदन ग्रान्डी अस्पताललाई बुझाउँदै कानुनी कारबाही अगाडि बढाउने निर्णय गरेको काउन्सिल स्रोतले जनाएको छ।

तीन महिनाअघिको घटना सम्झँदै न्यौपानेले भनिन्– ‘बच्चा जन्माउने योजनादेखि नै ग्रान्डीका चिकित्सकहरूको सल्लाह र सुझावअनुसार अघि बढ्यौं। पूरा समय नहुँदै ३६ हप्तामा सिजरिङ गरी बच्चा निकाल्यौं।

उनीहरूले जे–जे भने त्यही–त्यही मान्यौं तर, उनीहरूको विश्वासमा पर्दा बच्चालाई एनआईसीयूको ब्याक्टेरियाका कारण निमोनिया भएछ। सोही कारण टाउकोमा पिप जमेर दिमाग नै नष्ट भएछ।