युनिकोड
फागुन २१ गते भएको प्रतिनिधिसभा सदस्य निर्वाचनमा नवलपरासी पश्चिमका दुवै निर्वाचन क्षेत्रमा जित हासिल गर्दै राष्ट्रिय स्वतन्त्र पार्टी (रास्वपा) ले ‘क्लिन स्विप’ गरेको छ।
जिल्लाका दुवै क्षेत्र १ र २ मा रास्वपाका उम्मेदवारले ठुलो मतान्तरसहित विजय हासिल गरेका हुन्।
निर्वाचन क्षेत्र नम्बर १ मा रास्वपाका विक्रम खनाल ४५ हजार २४१ मतसहित विजयी भए।
उनका निकटतम प्रतिस्पर्धी नेपाली कांग्रेसका बिनोद कुमार चौधरी ले ९ हजार ५०२ मत प्राप्त गरे।
नेकपा एमालेका रामप्रसाद पाण्डे ले ७ हजार ९५६, जसपा नेपालका हृदयेश त्रिपाठीले ७ हजार ८३२, राप्रपाका नवनित मिश्र ले १ हजार ५९३, नेकपाका सिन्धु जलेसा ले १ हजार ५६ र नेपाल कम्युनिस्ट पार्टीका राजु हरिजनले ७५१ मत प्राप्त गरेका छन्।
यस क्षेत्रमा कुल ८२ हजार १०७ मत गणना भएकोमा ५ हजार १८ मत बदर भएका छन् भने ७७ हजार ८९ मत सदर भएको छ।
खनालले निकटतम प्रतिस्पर्धी चौधरीलाई झण्डै ३५ हजार ७३९ मतान्तरले पराजित गरेका छन्।
यस्तै निर्वाचन क्षेत्र नम्बर २ मा पनि रास्वपाका नरेन्द्रकुमार गुप्ता ४४ हजार १३८ मतसहित विजयी भएका छन्। उनका प्रतिस्पर्धी नेपाली कांग्रेसका भरत थापा ले १५ हजार ९४५ मत पाए।
जनता समाजवादी पार्टीका देवेन्द्र यादव ले ७ हजार २१२, राष्ट्रिय प्रजातन्त्र पार्टीका ध्रुव बहादुर प्रधान ले ४ हजार ६९१, नेकपा एमालेका लेखनाथ खरेल ले ४ हजार ३११, नेकपाका देवेन्द्र पौडेल ले १ हजार ८३८ र जनमत पार्टीका जीवन मल्लाहले १ हजार ६४ मत प्राप्त गरेका छन्।
क्षेत्र नम्बर २ मा कुल ८८ हजार ९१५ मतगणना भएकामा ५ हजार ४५९ मत बदर भएका छन् भने ८३ हजार ४५६ मत सदर भएको निर्वाचन अधिकृतको कार्यालयले जनाएको छ।
यससँगै नवलपरासी पश्चिमका दुवै क्षेत्रमा रास्वपाले आफ्नो पकड बलियो बनाएको छ।
प्रतिक्रिया