युनिकोड
मध्यस्थकर्ताहरूले बिहीबार बताएअनुसार इरान र संयुक्त राज्य अमेरिकाले कतारको राजधानी दोहामा भएको अप्रत्यक्ष वार्ताको पहिलो चरण समाप्त गरेका छन्।
हालै दुई देशबिच भएको गोलाबारीपछि तनाव कम गर्न र वार्ता अघि बढाउन प्रयास जारी छ।
जुनमा वासिङटन र तेहरानले कतार र पाकिस्तानको मध्यस्थतामा समझदारी पत्रमा सहमति जनाएका थिए। यसमा फेब्रुअरीको अन्त्यमा अमेरिका–इजरायलको हवाई हमलापछि सुरु भएको युद्धलाई ६० दिन रोक्ने तथा नाकाबन्दी गरिएको हर्मुज जलमार्ग (जलडमरुमध्य) फेरि खोल्ने व्यवस्था समावेश थियो।
द्वन्द्वरत दुई राष्ट्रबिच भएको १४ बुँदे यो सम्झौताले युद्धलाई स्थायी रूपमा अन्त्य गर्न, हर्मुजको व्यवस्था, इरानको पुनर्निर्माण कोष र इरानको आणविक कार्यक्रमजस्ता विषयमा छलफल गर्न समयसीमा पनि तोकेको थियो।
सहमति
दोहामा बुधबार दुई द्वन्द्वरत पक्षबिच अप्रत्यक्ष छलफलपछि अमेरिकाका राष्ट्रपति डोनाल्ड ट्रम्प तथा मध्यस्थकर्ता कतार र पाकिस्तानले कूटनीतिक संवाद अगाडि बढिरहेको सङ्केत दिएका छन्।
“कतार र पाकिस्तानका मध्यस्थकर्ताहरूले दोहामा बुधबार अमेरिका र इरानका वार्ताकारहरूसँग छुट्टाछुट्टै बैठक भएका छन् र सकारात्मक प्रगति भएको छ,” दुवै मध्यस्थकर्ता राष्ट्रले बिहीबार जारी गरेको विज्ञप्तिमा भनेका छन्।
वार्ता समाप्तिपछि इरानको प्रतिनिधिमण्डलको नेतृत्व गरेका विदेश मन्त्रालयका उपमन्त्री काजेम गारिबाबादीले समझदारीपत्रको उल्लंघन रिपोर्ट गर्न र रेकर्ड गर्न सञ्चार च्यानल स्थापना गर्ने सहमति भएको बताए।
तेहरानले कुनै पनि समाधानको भागका रूपमा माग गर्दै आएको रोक्का गरिएको इरानी सम्पत्तिको मुद्दा पनि छलफलमा आएको गारिबाबादीले बताए।
उनले सुरुको ६ अर्ब डलरको केही भागको प्रयोगबारे समीक्षा गरिएको र इरानलाई आवश्यक वस्तु खरिद गरी उपलब्ध गराउने सहमति भएको बताए।
ट्रम्पले बुधबार ‘एअर फोर्स वन’मा चढ्नुअघि पत्रकारहरूसँग भने, “इरानको आणविक निशस्त्रीकरण राम्रोसँग अघि बढिरहेको छ।”
एक स्रोतल एएफपीसँग नाम उल्लेख नगर्ने सर्तमा भने, दोहाको अप्रत्यक्ष वार्ता मुख्य रूपमा हर्मुज जलडमरुमध्यको व्यवस्थामा केन्द्रित थियो भने आणविक मुद्दालाई पछिका चरणमा गहिरो छलफल गर्न बाँकी राखिएको थियो।
अब के हुन्छ?
आगामी अमेरिका–इरान अप्रत्यक्ष वार्ता इरानका दिवङ्गत सर्वोच्च नेता अयातोल्लाह अली खामेनीको अन्त्येष्टिपछि हुनेछ।
अयातोल्लाह अली खामेनी ८६ वर्षको उमेरमा अमेरिका-इजरायलको हवाई हमलामा २८ फेब्रुअरीमा तेहरानको केन्द्रस्थित आफ्नै आवासमा मारिएका थिए।
त्यसपछि शक्ति तुरुन्तै उनको छोरा मोजतबालाई सरेको थियो। अली खामेनीको सार्वजनिक अन्त्येष्टि शनिबार सुरु हुनेछ।
उनको शव तेहरानको केन्द्रमा रहेको विशाल परिसरमा राखिनेछ, जहाँ शुक्रबार गरिने प्रमुख प्रार्थना, आधिकारिक कार्यक्रम र धार्मिक सभा हुने गर्छन्।
कतार र पाकिस्तानले विज्ञप्तिमा दुवै पक्षले कुराकानी जारी राख्ने सहमति गरेको बताएका छन्।
शवयात्रापछि यथासम्भव चाँडो अर्को बैठक राखिने उनीहरूले उल्लेख गरेका छन्।
दिवंगत खामेनीको अन्तिम संस्कार ९ जुलाईमा उत्तरपूर्वी सहर मसहदको इमाम रेजाको मस्जिदमा हुनेछ। मसहदजुन खामेनीको जन्मस्थल हो।
मध्यपूर्व तनावको अवस्था
जुनमा अमेरिका–इरान सम्झौता भएपछि दुवै पक्षले खाडीमा छिटपुट गोलीबारी गरेका छन्। हर्मुज जलमार्गमा आफ्नो नियनत्रणलाई तेहरानले लागु गर्न खोज्दा बारम्बार झडप निम्तिएको छ।
सबैभन्दा पछि यो हप्ताको सुरुमा अमेरिकी सेन्ट्रल कमान्डले १० इरानी सैन्य लक्ष्यमा हमला गरेको बताएको थियो, जसलाई अमेरिकाले ‘व्यावसायिक जहाजमा इरानको निरन्तर आक्रामकता’ को जवाफ भनेको थियो।
इरानले पनि आक्रमणको बदलामा भन्दै कुवेत र बहराइनमा रहेका अमेरिकी आधारमा जवाफी हमला गरेको दाबी गरेको थियो।
दुवै देशले आक्रमणका लागि तेहरानको निन्दा गरेका थिए। तर कतारमा वार्ता हुनुअघिका दिनहरूमा गोलाबारी रोकिएको देखिएको छ।
लेबनान मोर्चामा इजरायल र हिजबुल्लाहबिचको लडाइँ अपेक्षाकृत शान्त छ, यद्यपि राष्ट्रिय समाचार संस्था (नेसनल न्युज एजेन्सी)ले बुधबार साँझ दक्षिणी सहर नबातिएहमा हमला भएको रिपोर्ट गरेको छ।
यद्यपि आक्रमणबाट भएको क्षति वा पीडितबारे उल्लेख छैन।
दुई देशबिचको प्रस्तावित सहमतिहनुसार लेबनानले अझै इजरायल ‘पाइलट जोन’ बाट फिर्ता होस् भन्ने चाहन्छ र त्यहाँ लेबनानी सेना तैनाथ हुनेछ।
तेहरानले कुनै पनि सम्झौतामा यो समानान्तर द्वन्द्व अन्त्य र दक्षिणी लेबनानबाट इजरायली सेना फिर्ता हुनुपर्ने अडान राखेको छ, जसको केही भाग इजरायलले कब्जा गरेको छ।
प्रतिक्रिया