युनिकोड
अमेरिकाले संयुक्त राष्ट्र संघ (यूएन) का निकायसहित ६६ वटा अन्तर्राष्ट्रिय संघ-संस्थाबाट बाहिरिने निर्णय गरेको छ।
राष्ट्रपति डोनाल्ड ट्रम्पले बुधबार कार्यकारी आदेशमा हस्ताक्षर गर्दै ६६ वटा अन्तर्राष्ट्रिय संगठन, सन्धि र संस्थाबाट अलग हुने निर्णय गरेका हुन्।
ह्वाइट हाउसका अनुसार ती संस्था अब अमेरिकाको हितमा नरहेको र अमेरिकी करदाताहरूको पैसा बर्बाद मात्र भइरहेको निष्कर्षसहित अमेरिकाले यूएन सम्बद्धसहित ६६ वटा अन्तर्राष्ट्रिय संघ-संस्थाबाट अलग हुने निर्णय गरेको हो।
ह्वाइट हाउसले जारी गरेको विज्ञप्तिमा भनिएको छ, ‘निर्णयअन्तर्गत अमेरिका ३१ वटा संयुक्त राष्ट्र संघ (यूएन) सम्बद्ध निकाय र ३५ वटा गैरसंयुक्त राष्ट्र संघ (नन-यूएन) संस्थाबाट अलग हुनेछ।’
यूएन बाहिरका संस्थामध्ये एटलान्टिक सहकार्य साझेदारी, अन्तर्राष्ट्रिय लोकतन्त्र तथा निर्वाचन सहायता संस्था र अन्तर्राष्ट्रिय प्रतिआकंवादसम्बन्धी फोरम पनि छन्।
ट्रम्पले देशका सबै सरकारी विभाग र एजेन्सीलाई ती संस्थाबाट अमेरिकालाई ‘सकेसम्म चाँडो’ फिर्ता लिने प्रक्रिया सुरु गर्न निर्देशन दिएका छन्।
विश्व स्वास्थ्य संगठन (डब्ल्यूएचओ), प्यालेस्टिनी शरणार्थीसम्बन्धी यूएन एजेन्सी (यूएनआरडब्ल्यूए), यूएन मानवअधिकार परिषद् र यूनेस्कोजस्ता संस्थाबाट भने अमरिका यसअघि नै अलग भइसकेको छ।
ट्रम्पको यो कदमले अमेरिका विश्वव्यापी सहकार्यबाट टाढा हुँदै गएको संकेत गरेको छ।
प्रतिक्रिया