कंगोको सुनखानीमा पहिरो जाँदा ५० जनाको मृत्यु

कंगोको एउटा सुनखानीमा पहिरो जाँदा कम्तीमा पनि ५० जना कामदारको मृत्यु भएको छ।

धेरै दिनदेखिको भारी वर्षापछि सुनखानीमा पहिरो गएको अधिकारीहरुले जनाएका छन्। कंगोको दक्षिण किवु प्रान्तको कमितुगा सहरमा शुक्रबार घटना भएको हो।

प्रान्तीय गभर्नर थेओ एनग्वाबिड्जे कासीले शनिबार बिहान एक विज्ञप्तिमार्फत् घटनाको पुष्टि गरेका छन्। ‘पीडितहरूमध्ये केही बालबालिकासहित अधिकांश युवाहरु रहेका छन्,’ विज्ञप्तिमा भनिएको छ।

 प्रान्तीय प्रशासक कासीले उद्धारकर्ताहरूले मृतकको पहिचान गर्न र खानीबाट शवहरू बाहिर निकाल्न निरन्तर खटिरहेको जनाएका छन्।

खानीका लागि खनिएका तीन वटा गहिरा खाडलमा पानी पसेपछि पहिरो गएको हो। घटनापछि त्यहाँ दुई दिने शोकको घोषणा गरिएको छ। -एजेन्सी