गुजरातमा उड्दै आएको वस्तु विस्फोट, पाकिस्तानले पठाएको हो कि होइन भनेर अनुसन्धान

भारतीय राज्य गुजरातमा पर्ने कच्छ जिल्लाको भारत-पाकिस्तान सीमानजिकै रहेको खावडा क्षेत्रमा आज बिहान एउटा विस्फोट भएको छ।

भारतीय पत्रिका दैनिक भास्करका अनुसार एउटा शंकास्पद उडिरहेको वस्तु हाई टेन्सन पावर लाइनमा ठोक्किएर विस्फोट भएको हो। 

घटना बिहान ६ बजेतिर भारत पुल सीमानजिकै भएको हो।

भुजको दुर्गम गाउँ कोटाडा नजिकैको प्रतिबन्धित क्षेत्रमा घटना भएपछि प्रहरी, वायुसेना र सुरक्षा निकायहरू तुरुन्तै सक्रिय भएका छन्।

यो उडिरहेको वस्तु पाकिस्तानबाट आएको हो कि होइन भनेर पत्ता लगाउन अनुसन्धान भइरहेको छ।

पश्चिम कच्छका एसपी विकास सुन्दाले  प्रहरी तुरुन्तै घटनास्थलमा पुगेको र शंकास्पद वस्तु वायुसेनालाई बुझाइएको बताएका छन्। 

अहिले वायुसेना र बीएसएफले संयुक्त रूपमा यसको अनुसन्धान गरिरहेका छन्। सुरक्षा निकायलाई सतर्क गराइएको छ।