युक्रेनमा युद्धरत सेनाको मनोबल बढाउन संगीतकार र गायक पठाउँदै पुटिन

रूसले युक्रेनमा युद्ध लडिरहेका आफ्ना सैनिकहरुको मनोबल बढाउन संगीतकार र गायकहरुलाई पठाउने भएको छ।

रूसी रक्षा मन्त्रालयका अनुसार 'फ्रन्ट लाइन क्रिएटिभ ब्रिगेड' बनाएर त्यसमा सर्कसमा काम गर्नेहरुलाई पनि सहभागी गराउने तयारी छ।

बेलायती रक्षा मन्त्रालयले गत आइतवार आफ्नो गुप्तचर अपडेटमा रुसले यो ब्रिगेड बनाएको दाबी गरेको हो। 

यसअघि बेलायती रक्षा अधिकारीहरुले रूसी सुरक्षाकर्मीको मनोबल घट्नु उसका लागि एक ठूलो जोखिम रहेको बताएको थियो। 

बेलायतले भनेको छ, ‘सर्वसाधारणलाई आफ्नो संगीत वाद्ययन्त्र सेनालाई दान दिन भनिएको छ। सैन्य संगीतलाई सेनाका टोलीको मनोबल बढाउन प्रयोग गरिँदैछ।'

रूसी समाचार समूह आरबीसीका अनुसार पुटिनले हालै गरेको घोषणाअनुसार नयाँ भर्ती भएका सेनालाई यस ब्रिगेडमा सामेल गरिँदैछ।