‘मालती मंगले’ को वर्कसपमा विजयदेखि वर्षासहितको सहभागिता

यतिखेर फिल्म ‘मालती मंगले’को कार्यशाला काठमाडौँमा भइरहेको छ। चलचित्रका पटकथा तथा संवाद लेखक संयोग गुरागाईँको संयोजनमा वर्कसप सञ्चालन भइरहेको हो।

वर्कसपमा विजय बराल, वर्षा राउत, सुवर्ण थापा, मेक्सम गौडेल, प्रकाश घिमिरे, सरिता गिरी, सुस्मा निरौला, सुनिल तामाङ, उमेश सुनाम, शकु शाह, सुचित्रा उप्रेती, दिनेश जङ्ग ठकुरी, रिजन परियार, सागर भट्टराईलगायत कलाकारहरू सहभागी छन्। भदौ दोस्रो हप्तादेखि छायाङ्कनमा जाने तयारी छ।

वर्कसपको क्रममा अभिनेता विजय बरालले चलचित्रले नेपाली समाजको यथार्थ जीवनका कथालाई रोचक तरिकाले प्रस्तुत गर्ने विश्वास व्यक्त गरे। उनले भने, ‘पात्रलाई अझै नजिकबाट बुझ्न यो वर्कसपले ठुलो मद्दत पुर्‍याएको छ। दर्शकले आफ्नो कथा पर्दामा देखेझैँ अनुभूति गर्नेछन्।’

त्यसैगरि, अभिनेत्री वर्षा राउतले वर्कसपलाई आफूलाई पात्रमा ढाल्ने अवसरका रूपमा लिएको बताइन्। उनले भनिन्, ‘यो चलचित्र पारिवारिक भावनासँग जोडिएको छ। वर्कसपमार्फत पात्रको गहिराइमा पुग्ने अवसर पाइरहेकी छु।’

‘मालती मंगले’लाई प्रकु पाण्डेयले निर्देशन गर्नेछन्। कथा पाण्डेय स्वयंले लेखेका हुन् भने पटकथा तथा संवाद गुरागाईँले तयार पारेका छन्। फिल्मको छायाङ्कन तनहुँ र स्याङ्जा जिल्लाका विभिन्न भूभागमा हुने कार्यकारी निर्माता सागर ज्ञवालीले जानकारी दिए।

रानी म्युजिक इन्टरनेशनल प्रा.लि.को ब्यानर र युनी इन्टरटेनमेन्टको सहकार्यमा निर्माण हुने यस चलचित्रका निर्माता लोकप्रिय गायक रामकृष्ण ढकाल हुन्। निर्देशक पाण्डेयका अनुसार ‘मालती मंगले’ पारिवारिक प्रेमकथामा आधारित चलचित्र हुनेछ।