युनिकोड
जाजरकोट भूकम्पबाट पीडितलाई सहयोगका लागि छिमेकी मुलुकहरू भारत र चीनले थप सहायता सामग्री उपलब्ध गराउने भएका छन्।
सोमबार साँझ प्रधानमन्त्री पुष्पकमल दाहाल प्रचण्डसँग भएका छुट्टाछुट्टै भेटवार्तामा भारतीय राजदूत नवीन श्रीवास्तव र चिनियाँ राजदूत छेन सोङले नेपालका भूकम्पपीडितका लागि थप सहयोग गर्ने बताएका हुन्।
प्रधानमन्त्रीका प्रेस सल्लाहकार गोविन्द आचार्यका अनुसार छलफलमा दुवै देशबाट थप १०/१० हजार थान टेन्ट, पाल, ब्लाङ्केटलगायतका सामग्री भूकम्प प्रभावित क्षेत्रका लागि उपलब्ध गराउने कुरा भएको छ।
यही कात्तिक १७ गते राति जाजरकोटको रामीडाँडा केन्द्रबिन्दु भएर गएको ६.४ म्याग्निच्युडको भूकम्प जाँदा जाजरकोट र रुकुम पश्चिममा १५३ जनाको मृत्यु भएको छ भने ३३८ जना घाइते भएका छन्। करोडौँ बराबरका भौतिक संरचना क्षति भएका छन्।
त्यसयता पनि जाजरकोट केन्द्रबिन्दु भएर पटकपटक परकम्प गइरहेका छन्।
प्रतिक्रिया