यूईएफए च्याम्पियन्स लिगको उपाधिका लागि म्यानचेस्टर सिटी र चेल्सी भिड्ने भएका छन्। उनीहरूबीच यही मे २९ मा प्रतिस्पर्धा हुनेछ।
बुधबार राति भएको दोस्रो सेमिफाइनलको दोस्रो लेगमा रियल मड्रिडलाई २–० ले तथा समग्रमा ३–१ ले पराजित गर्दै चेल्सीले सिटीसँगको भेट पक्का गरेको हो। सिटीले फ्रान्सेली क्लब पेरिस सेन्ट जर्मन (पीएसजी) लाई २–० ले तथा समग्रमा ४–१ ले हराउँदै फाइनल पुगेको हो।
सिटीले पहिलोपटक र चेल्सीले तेस्रोपटक च्याम्पियन्स लिगको फाइनल खेल्न लागेका हुन्। चेल्सीले यसअघि सन् २०१२ मा उपाधि जितेको थियो।
घरेलु मैदान स्टामफर्ड ब्रिजमा चेल्सीका लागि लागि फरवार्ड टिमो वेर्नर र मिडफिल्डर मेसन माउन्टले गोल गरे।
खेलको २८औं मिनेटमा जर्मन फरवार्ड वेर्नरको गोलमा चेल्सीले सुरुवाती अग्रता बनाएको थियो। ८५औं मिनेटमा माउन्टले गोल गर्दै चेल्सीको जित निश्चित गरे।
प्रतिक्रिया