युनिकोड
आरबीबी एनभीए राष्ट्रिय महिला तथा पुरुष भलिबल क्लब च्याम्पियनसिप माघ पहिलो साता हुने भएको छ।
नेपाल भलिबल संघले सोमबार पत्रकार सम्मेलन गर्दै प्रतियोगिता माघ ३ गते देखि १० गते सम्म हुने जनाएको हो। प्रतियोगिता त्रिपुरेश्वरस्थित राष्ट्रिय खेलकुद परिषद् (राखेप) को कभर्ड हालमा हुनेछ।
राष्ट्रिय वाणिज्य बैंकको मुख्य प्रायोजनमा हुने प्रतियोगितामा महिलातर्फ ८ र पुरुषतर्फ १२ टोलीको सहभागिता रहने संघले जनाएको छ। महिलामा तीन विभागीय टोली (नेपाल पुलिस, त्रिभुवन आर्मी र एपीएफ), न्यू डायमन्ड, जावलाखेल,ढोरपाटन, चितवन टाइग्रेस र गन्डकी प्रदेशको सहभागिता रहनेछ।
पुरुषमा तीन विभाग, हेल्प नेपाल, मणिमुकुन्द, नयाँ बजार, जावलाखेल, ढोरपाटन, काभ्रे जिल्ला, गण्डकी प्रदेश, आरजि भलिबल ग्रुप र पार्वती युवा क्लबले प्रतिस्पर्धा हुनेछ।
प्रतियोगितामा सहभागी क्लबले ३ जना विदेशी खेलाडी राख्न पाउनेछन्। प्रतियोगिताको गत संस्करण महिलातर्फ एपीएफ र पुरुषतर्फ त्रिभुवन आर्मी क्लबले जितेको थियो।
विजेताले उपाधिसहित २ लाख र दोस्रो हुने टोलीले १ लाख र तेस्रो टोलीले ५० हजार रुपैयाँ पाउनेछन्। प्रतियोगिताको सर्वोत्कृष्ट खेलाडी महिला/पुरुषले समान २५ हजार रुपैयाँ प्राप्त गर्नेछन्।
त्यस्तै दुवैतर्फका उत्कृष्ट लिब्रो, सर्भर, ब्लकर, लिफ्टर, स्पाइकर र प्रशिक्षकले समान १० हजार रुपैयाँ पाउनेछन्। प्रतियोगिताका लागि २३ लाख रुपैयाँ खर्च हुने संघले जनाएको छ।
प्रतिक्रिया