युनिकोड
९ हजार २ सय ७० मतदाता भएको पृथ्वीनारायण क्याम्पसमा स्ववियु निर्वाचनको मतदान प्रक्रिया रोकोएको छ। समानुपातिक निर्वाचन प्रणालीमा अखिल (छैटौं) को अध्यक्षको नाम रहेको तर मतदानको लागि कोष्ट नभएको भन्दै सो संगठनले आपत्ति जनाएपछि बिहान ८ बजेबाट सुरु हुने भनिएको चुनाव रोकिएको थियो।अखिल छैटौँबाट मिलन सुनार चुनावी मैदानमा छन्।
उनको उम्मेदवारीप्रति निर्वाचन समितिको बैठकमा नै जातीय रुपले अभद्र टिप्पणी गरिएको र समानुपातिक मतपत्रमा पनि कोष्ट नराखिएको भन्दै सो संगठनका अध्यक्ष सोमनाथ अधिकारीले यथास्थितिमा चुनाव हुन नसक्ने बताएका थिए। लगत्तै बसेको सर्वपक्षीय बैठकले गल्ती सच्याउने भने पनि मतपत्र आउन समय लाग्यो।
यहीबीचमा अखिल र नेवि संघले चुनाव छिटो गराउन माग गरे। उनीहरूले क्याम्पस गेट बाहिर गरेको प्रदर्शनमा प्रहरीले सामान्य वल प्रयोग गर्यो।
अन्त्तत: मतपत्र बनाउन समय लाग्ने भन्दै निर्वाचन समितिले चुनाव रोकिदियो।निर्वाचन अधिकृत प्रा.डा. रामचन्द्र पोखरेलले चुनाव भोलि हुने जानकारी दिएका छन्।यता स्वतन्त्र उम्मेदवारी दिएका र अन्य संगठनले अखिल र नेवि संघ चुनावबाट भागेको आरोप लगाएका छन्।
पृथ्वीनारायण क्याम्पसको स्ववियुको २२ औं अध्यक्ष बन्न अखिल छैंटौंका मिलनसहित ८ जना मैदानमा छन्।
स्ववियु अध्यक्षमा अखिल (क्रान्तिकारी)बाट नविन अधिकारी, प्राज्ञिक विद्यार्थी परिषद् नेपालबाट दिप्सन गुरूङ, नेपाल विद्यार्थी संघबाट सुशील न्यौपाने, संयुक्त प्यानलबाट सन्तोष पौडेल, अनेरास्ववियुबाट विष्णु पोखरेल उम्मेदवार छन्। कमल सुवेदी र विप्लवी न्यौपाने स्वतन्त्र उम्मेदवारको रुपमा रहेका छ्न्।
समानुपातिकतर्फ अखिल (क्रान्तिकारी), अनेरास्ववियू, प्राज्ञिक विद्यार्थी परिषद नेपाल, अखिल (छैठौ), अखिल (क्रान्तिकारी) वैद्य, नेपाल विद्यार्थी संघ, अनेरास्ववियु, अखिल (समाजवादी) र नयाँ शक्ति विद्यार्थी युनियनले उम्मेद्वारी दिएका छन्।
प्रतिक्रिया