काठमाडौंमा सुन र पेस्तोल फालेर भाग्ने तीन जना नवलपरासीमा पक्राउ

काठमाडौंको कमलादीमा ५ सय ग्राम सुनसहित १५ किलो पहेँलाे धातु र २ पेस्तोल छाडेर भागेकामध्ये तीनजना पक्राउ परेका छन्।

स्रोतका अनुसार देवानसिंह पटेल, मिदेश सकिया र सञ्जय पटेल पक्राउ परेका हुन्। उनीहरु तीनै जना पूर्वीनवलपरासीबाट पक्राउ परेका हुन्।

प्रहरी उच्च स्रोतका अनुसार पक्राउ पर्नेमा बा ६च ५५१९ नम्बरको गाडीबाट सुन र पेस्तोल भएको झोला फाल्ने तीन जना छन्।

मंगलबार काठमाडौंको कमलपोखरीमा स्कर्पियो चेकजाँचका क्रममा सो घट्ना भएको थियो। प्रहरीले पिछा गरेपछि कमलादीमा १५ केजी सुनजस्तै पहेंलो बस्तु र दुई थान पेस्तोल फालेर सो स्कर्पियो भागेको बताएको थियो।

परीक्षण गर्दा १५ केजीमध्ये आधा केजी मात्रै सुन भएको पत्ता लागेको थियो। तर, हतियारसहितका अभियुक्त प्रहरीको अगाडिबाटै गाडीमा भाग्न सफल भएको भन्दै प्रहरीमाथि नै छानविन सुरु भएको हो।

दरबारमार्ग प्रहरी बृत्तले गरेको उक्त अप्रेसनका बारेमा अन्य युनिटलाई खबरसमेत नगर्दा अभियुक्त भाग्न सफल भएका थिए।