धादिङमा दुईवटा बस ठोकिँदा १ जनाको मृत्यु, अन्य केही घाइते

धादिङको थाक्रेमा दुईवटा बस आपसमा ठोकिँदा एक जनाको मृत्यु भएको छ। 

थाक्रे गाउँपालिकास्थित महादेवबेँसी नजिकै आज बिहान दुईवटा बस आपसमा ठोक्किएका हुन्। 

काठमाडौँबाट रसुवाका लागि छुटेको बागमती प्रदेश०१-००६ख ५२०८ नम्बरको बस र दाङबाट काठमाडौँ जाँदै गरेको प्रदेश ३-०१-००६ ख १५५२ नम्बरको बस आइतबार बिहान ठोक्किएका थिए।  

दुर्घटनामा एक जनाको मृत्यु भएको छ। तर मृतकको पहिचान नभएको जिल्ला ट्राफिक प्रहरी कार्यालय गजुरी धादिङका प्रहरी निरीक्षक शिशिर थापाले जानकारी दिए। 

ठक्करपछि बस अनियन्त्रित भई सडक किनारामा रहेको चिया पसलमा गएर ठाेकिँदा एक व्यक्तिको मृत्यु भएको हो।

प्रहरी निरीक्षक थापाले मृतकको पहिचानको प्रयास भइरहेको बताए। दुर्घटनाका घाइतेहरूको सङ्ख्या यकिन भइसकेको छैन। अहिले उद्धारकार्य जारी छ।