युनिकोड
अनिवार्य अवकाश पाउनुभन्दा तीन दिनअगाडि नायब महान्यायाधिवक्ता टेकबहादुर घिमिरेले दिएको राजीनामा सरकारले स्वीकृत गरेको छ।
सरकारका प्रवक्ता सञ्चार तथा सूचना प्रविधिमन्त्री पृथ्वीसुब्बा गुरुङले आज साउन ७ गते दिएको जानकारीअनुसार घिमिरेले दिएको राजीनामा साउन ४ गते नै बसेको मन्त्रिपरिषद् बैठकले स्वीकृत गरेको हो।
साउन ४ गते बसेको मन्त्रिपरिषद् बैठकको निर्णय नम्बर १० मा भनिएको छ, ‘नायब महान्यायाधिवक्ता डा. टेकबहादुर घिमिरेले २०८२/४/२ देखि लागु हुने गरी पेस गर्नुभएको स्वैच्छिक अवकाश स्वीकृत गर्ने।’
संघीय मामिला तथा सामान्य प्रशासन मन्त्रालयअन्तर्गतको राष्ट्रिय किताबखाना (निजामती) ले घिमिरे यही साउन ५ गते अनिवार्य अवकाशमा जाने उल्लेख गरेको छ।
त्यसको ३ दिनअघि साउन २ गते दिएको राजीनामा मन्त्रिपरिषद्ले ४ गते स्वीकृत गरेको जानकारी सरकारले आज साउन ७ गते दिएको हो।
योसमेत साउन ४ गते मन्त्रिपरिषद्ले १० वटा निर्णय गरेको छ।
प्रतिक्रिया