युनिकोड
आज (सोमबार) चार प्रदेशका पहाडी क्षेत्रमा वर्षा तथा दुई प्रदेशका उच्च पहाडी र हिमाली भेगमा हिमपातको सम्भावना रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ।
महाशाखाले आज साँझ जारी गरेको मौसम पूर्वानुमान बुलेटिनअनुसार राति कोसी, बागमती, गण्डकी र कर्णाली प्रदेशका पहाडी भूभागका एक-दुई स्थानमा हल्का वर्षा हुने सम्भावना देखिएको हो। साथै गण्डकी र कर्णाली प्रदेशका उच्च पहाडी तथा हिमाली भूभागका एक-दुई स्थानमा हल्का हिमपात हुने सम्भावना छ।
यसबाहेक राति देशका पहाडी भेगमा आंशिक बदली र बाँकी स्थानमा मौसम मुख्यतया सफा रहने महाशाखाले जनाएको छ।
अहिले (सोमबार साँझ) पनि देशका पहाडी भेगमा आंशिक बदली (आकाशमा पातलो बादल) छ भने बाँकी स्थानमा मौसम मुख्यतया सफा (लगभग आकाश खुला) छ।
मौसम महाशाखाका अनुसार हाल देशभर पश्चिमी वायु र स्थानीय वायुको आंशिक प्रभाव छ।
प्रतिक्रिया