भक्तपुरको खरिपाटीमा बस पल्टिँदा १० जना घाइते, २ को अवस्था गम्भीर

भक्तपुरको खरिपाटीमा बस दुर्घटना भएको छ। चाँगुनारायण नगरपालिकाको तलकोटबाट यात्रु लिएर आउँदै गरेको बस आज दिउँसो खरिपाटीस्थित घुमाउनेमा दुर्घटना हुँदा १० जना घाइते भएका प्रहरीले जनाएको छ। 
    
चाँगुनारायण नगरपालिका कार्यालय नजिकैको घुमाउनेमा तीव्र गतिमा आएको प्रदेश–३–०१–००६ ख ०३१२ नम्बरको बस अनियन्त्रित भई सडकको खम्बामा ठोक्किएर दुर्घटना भएको हो।

दुर्घटनामा १० जना घाइते भएका जिल्ला ट्राफिक प्रहरी परिसरका प्रमुख एवं ट्राफिक प्रहरी निरीक्षक प्रदीप खत्रीले जानकारी दिए। घाइतेहरुको भक्तपुर अस्पतालमा उपचार भइरहेको छ।
    
दुर्घटनाका प्रत्यक्षदर्शी गोकर्ण पुरीले बस दुर्घटनाका घाइतेको आफूले उद्धार गरी एम्बुलेन्समा हालेर भक्तपुर अस्पताल पठाएको जानकारी दिए। बसकाे अगाडि बस्ने दुईजनाको अवस्था भने गम्भीर रहेको उनले बताए। बस खम्बामा ठोक्किएर दुर्घटना हुँदा विद्युतकाे खम्बासमेत भाँचिएको छ। रासस