युनिकोड
‘हाम फालेर मरौँकी त्रिशूलीको पानीमा’
घरमा बसु सौता त माइत सानीमा’
‘लेख्या रैछ कर्ममै बाच्नुपर्ने रोइ’
गायिका शर्मिला गुरुङले गाएको यो गीतले महिलाको वेदना बोलेको छ। सङ्गीतकार राजकुमार बगरले सङ्कलन गरेका शब्दमा भनिएजस्तै महिलाका वेदनाका तीज गीत पछिल्लो समय कमै सङ्कलन गरिन्छ। आजकालको तीजमा माइती र चेलीबीचको सम्बन्धका बारेमा भन्दा पनि व्यावसायिक र सस्तो लोकप्रिय हासिल हुने किसिमका गीत बजारमा आएका छन्।
पछिल्ला वर्षका तीजका गीतमा मौलिकता हराउन थालेको छ। नेपाली समाजमा आधुनिकताको प्रभावले यस्ता गीतमा मौलिकताको अभाव बढिरहेकै बेला सरोकारवालाले भने विकृति र विसङ्गति रोक्न चासो देखाएका छन्। हिन्दू नारीको मुख्य पर्वका रूपमा पहिचान बनाएको हरितालिका तीजका अवसरमा गाइने गीत समाज रुपान्तरणमा गुञ्जिनुपर्ने थियो तर तीजका गीतमा मौलिकपन भेटाउन मुस्किल हुन थालेको गुनासो पनि त्यत्तिकै मात्रामा नागरिक स्तरबाट सुनिन्छ।
घरपरिवारसँगै बसी सुन्न र हेर्न नसकिने खालका तीज गीतले प्रश्रय पाइरहेकै छन्। समाजले पचाउन नसकेका छाडा प्रकृतिका गीत बजारमा एकपछि अर्को सार्वजनिक भइरहेकै छन्। यस्ता गीतप्रति आमनागरिक, कलाकार तथा स्रटाहरुले अश्लीलता हटाउन र मौलिकपन भरिएका शब्दमा गीत रचना हुनुपर्ने धारणा बाहिएका छन्।
काठमाडौँ अनामनगरकी ६० वर्षीया हरिकला अधिकारलाई आजकाल बजारमा आएका तीज गीत कति पनि मन पर्दैन। गीतमा चेलीका वेदना, कथा व्यथाभन्दा पनि भड्काउ खालका परिवारसँगै बसेर हेर्न र सुन्नसमेत नसकिने खालका तीज गीत भएका कारण उनलाई सुन्न मन नलागेको हो। उनले भनिन्, ‘हाम्रा पालामा चेलीबेटीले भोगेका दुःख, दर्दका गीतहरू गाइन्थ्यो, चेलीले वर्षदिन भरी भोगेका पीडालाई गीतको माध्यमबाट सुनाउने गर्दथे, तीजका गीतमा कति मीठा शब्द राखिएको हुन्थ्यो, तर अहिले सुन्न पनि नसक्ने खालका तीज गीत बजारमा आएका छन्, सुन्न पनि नसकिने असभ्य लाग्ने खालका छन्।’
हरिकलाले भनेजस्तै अहिले बजारमा कतपय तीज गीत परिवारसँगै बसेर सुन्न र हेर्न नसक्ने खालका आएका छन्। एक महिनाअघि बजारमा ल्याइएको ‘पापाकी परी’ नामको गीत उच्छृंखल शब्द र दृश्य राखिएको जनाउँदै विवादमा तानिएको थियो।
गायक तथा सङ्गीतकार शिव हमालले सिर्जना गरेको सो गीतमा ‘मोडल’ करिश्मा ढकालले पेटिकोट लगाएर पानी पँधेरोमा नुहाउँदै, गाउँदै नाच्दै गरेको भिडिओ देख्न सकिन्छ। गीतमा ‘के हुन्छ होला है बिहेको राति, अँध्यारो कोठामा अन्जान साथी, सम्झेर गइसक्यो सातो बरिलै’ भन्ने शब्द राखिएको छ। गायिका सुशीला पाठकले गाएको यो तीज गीत मात्रै होइन उत्ताउलो पहिरन, पश्चिमी शैलीको नृत्य, म्युजिक भिडिओ पनि उस्तै खालका हेरिनसक्नु छन्, ती म्युजिक भिडिओ बजारमा प्रशस्तै भेटिन्छन्।
गायक राजु परियार हरितालिका तीजका गीतमा मौलिकता हराउँदै गएकोमा चिन्ता व्यक्त गर्छन्। उनले भने, ‘बजारमा आएका सबै तीज गीतमा होइन, केही तीजका गीतमा मौलिकताको कमी हुँदै गएको पाइन्छ, पहिले पहिलेका तीज गीतमा झै अहिलेका तीजका गीतमा मेहनत कमी हुँदा विकृति विसङ्गति बढेको हो।’
राष्ट्रिय लोक तथा दोहोरी गीत प्रतिष्ठानका उपाध्यक्ष राधिका हमालले विकृति विसङ्गतिमा हटाउन प्रतिष्ठान लागिपरेको बताइन्। गीतमा मौलिकता हराउनुभन्दा पनि समयअनुसार गीत गाउन थालिएको उनको भनाइ छ। तीजका विवादित गीतप्रति प्रतिष्ठानको निगरानी र सचेतनाका कारण यसपालि विकृति र विसङ्गतिले भरिएका गीतमा न्यूनीकरण हुँदै गएको उनको भनाइ छ।
पछिल्लो समय बजारमा आएका तीज गीतमा चेली र माइतीका वेदनाभन्दा पनि माया प्रेम, महिलाले लगाएको पहिरनको बयानलगायतको विषयमा तीजका गीत गाउने गरिएको छ। यस वर्ष बजार आएका ‘झमझम झम्कना लाऊँ कि नलाऊँ म’, ‘मै मोटी’, ‘दोदोरो मादल’, ‘ढुङ्गे धारा’, ‘मै राम्रो छैन’, ‘राधा’, र ‘डुबाउला रानीलाई’ लगायतका तीज गीत चर्चामा छन्।
गायक तथा सङ्गीतकार नारायण रायमाझीले पछिल्लो पटकका तीजका गीतमा मौलिकता गुमेको र विकृति विसङ्गति बढ्दै गएको टिप्पणी गरे। उनले भने, ‘तीजको महत्त्व, माइती र चेलीबीच सम्बन्धसँग जोडिएको हुन्छ, तर, यसको महत्व बिस्तारै घट्दै गएको छ, पछिल्ला पटकका गीतमा व्यावसायिकताको नाममा विकृति र विसङ्गति बढिरहेको छ।’ तीजको गीत गाउनेमा महिलाभन्दा पुरुषको आकर्षण बढेको उनको धारणा छ।
त्यसो त विगतका वर्षमा तीजका समयमा उत्ताउला खालका तीजका गीत नल्याइएको होइन। ‘पोइल जान पाम’, ‘डिस्कोमा तीज’, ‘छोटो लुगा’, ‘देखियो जामा फाटेर’ ‘तीजमा दरको साटो रक्सी खाइन्छ’ जस्ता गीत पनि शब्द र ‘भिडिओ’का कारण विवादमा परेका थियो। रासस
प्रतिक्रिया