युनिकोड
नेपाली कम्युनिस्ट पार्टी (नेकपा) का नेता वर्षमान पुनले आगामी निर्वाचनसम्म जनतालाई सङ्गठित गरी नयाँ आन्दोलनको ज्वारभाटा सिर्जना गर्नसके कम्युनिस्ट पार्टी फेरि शक्तिमा आउने बताएका छन्।
शनिबार नेकपा मुख्यालय पेरिसडाँडामा आयोजित एक कार्यक्रमलाई सम्बोधन गर्दै नेता पुनले जनतालाई सही ढङ्गले प्रशिक्षित गर्नसके कम्युनिस्ट शक्ति फेरि स्थापित हुनेमा कुनै द्विविधा नरहेको बताए। ‘अहिले पनि हामी १७ सिटमै छौँ। अब आगामी निर्वाचनमा हामीले जनतालाई सङ्गठित गरेर नयाँ आन्दोलनका ज्वारभाटा ल्याउन सक्यौँ भने नेपाली कम्युनिस्ट पार्टी फेरि शक्तिमा आउनेछ, यसमा कुनै द्विविधा छैन,’ उनले भने, ‘त्यसका लागि हामीले प्रशिक्षण दिनैपर्ने हुन्छ।’
क्रान्तिकारी विचारको निरन्तरता नभएमा आन्दोलनले माथि उठाएको वर्ग नै प्रतिक्रान्तिको सहयोगी बन्नसक्ने जोखिम रहेको उनले औँल्याए। ‘क्रान्तिकारीहरू, कम्युनिस्टहरू क्रान्ति गर्छन्, जग्गा वितरण गर्छन्, रोजगारीको ग्यारेन्टी गर्छन् र मध्यम वर्गको विकास गराउँछन्। तर निरन्तर क्रान्तिकारी विचार प्रवाह गरिराखिएन भने के हुन्छ भने क्रान्तिकारी पार्टी र शक्तिले उकासेर माथि ल्याएको त्यही वर्ग फेरि प्रतिक्रान्तिकारी वा प्रतिक्रान्तिकारी शक्तिलाई सहयोग गर्ने हुनसक्छ,’ उनले भने, ‘मैले मध्यम वर्गलाई प्रतिक्रान्तिकारी भनिरहेको छैन।’
वैदेशिक रोजगारीका कारण नेपाली समाजमा परिरहेको प्रभाव र बदलिँदो भौतिक अवस्थाले मानिसको चेतनामा परिवर्तन ल्याइरहेको उनको तर्क छ। ‘आखिर ज्ञान कहाँबाट आउँछ र? ज्ञान हाम्रो अवस्थिति र वरिपरिको भौतिक परिस्थितिबाट आउँछ। अहिले मध्यम वर्ग बढ्दै गएको छ। हाम्रा हरेक घरबाट सन्तानहरू विदेश गइरहेका छन्,’ उनले भने।
बदलिँदो विश्व परिवेशको विश्लेषण गर्दै नेता पुनले भूमण्डलीकरण र डिजिटल पुँजीवादले सिर्जना गरेका चुनौतीबारे समेत सचेत रहनुपर्ने बताए। पुँजीवादले हरेक क्षेत्रलाई डिजिटल र भर्चुअल माध्यमबाट नियन्त्रण गरिरहेको उल्लेख गर्दै उनले यसको गहन अध्ययन गरी श्रमजीवी जनताको पक्षमा उपयोग गर्नुपर्नेमा जोड दिए।
‘भूमण्डलीकरण भएको छ, डिजिटल पुँजीवादको विस्तार भएको छ, र पुँजीवादले धेरैजसो कुरालाई डिजिटल तथा भर्चुअल रूपमा नियन्त्रण गरिरहेको छ,’ उनले थपे, ‘हामीले यो बदलिँदो दुनियाँलाई अध्ययन गर्न, विश्लेषण गर्न र त्यसलाई श्रमजीवी जनताको पक्षमा उपयोग गर्न सकेनौँ भने हामी हार्छौँ नै।’
प्रतिक्रिया