युनिकोड
प्रतिनिधि सभा निर्वाचनको मत परिणाम आउने क्रम जारी छ। शनिबार बिहान पौने ३ बजेसम्म १७ वटा निर्वाचन क्षेत्रको अन्तिम परिणाम सार्वजनिक भएको छ।
अहिलेसम्म १७ स्थानको परिणाम आउँदा राष्ट्रिय स्वतन्त्र पार्टी (रास्वपा) का उम्मेदवार ११ सिटमा विजयी हुँदा नेपाली कांग्रेसका उम्मेदवारले ४ सिटमा जित हात पारेका छन्। यस्तै नेपाली कम्युनिस्ट पार्टी (नेकपा)का उम्मेदवार २ ठाउँमा विजयी भएका छन्।
रास्वपाले जितेका ११ सिट
रास्वपाका काठमाडौँ-१ मा रञ्जु दर्शना, काठमाडौँ-३ मा राजुनाथ पाण्डे, काठमाडौँ-४ मा सुमित पोखरेल, काठमाडौँ-६ मा शिशिर खनाल, काठमाडौँ-७ मा गणेश पराजुली, काठमाडौँ-८ मा विराजभक्त श्रेष्ठ र काठमाडौँ-१० मा प्रदीप विष्ट विजयी भएका छन्।
२०७९ सालको निर्वाचनमा कांग्रेसले जितेको काठमाडौँ १, ३, ५ र १० रास्वपाले खोस्दा थियो भने ७ र ८ मा जित दोहोर्याएको छ।
यस्तै कास्की-३ मा रास्वपाकी बिना गुरूङ र कास्की-२ मा उत्तमप्रसाद पौडेल विजयी भएका छन्। गत निर्वाचनमा एमालेले जितेको कास्की २ र ३ मा रास्वपाले जित हात पारिसकेको हो।
यस्तै मोरङ-४ मा रास्वपाका सन्तोष राजवंशी निर्वाचित भएका छन्। गत निर्वाचनमा यहाँ तत्कालीन माओवादीका अमनलाल मोदी निर्वाचित भएका थिए।
यस्तै धनुषा-३ मा रास्वपाका मनिष झा निर्वाचित भएका छन्।
कांग्रेसले जितेका ४ क्षेत्र
रसुवामा कांग्रेसका मोहन आचार्य, मनाङमा टेकबहादुर गुरूङ, मुस्ताङमा योगेश गौचन थकाली र दैलेख-१ मा बासना थापा विजयी भएका छन्। रसुवा, मनाङ र मुस्ताङमा कांग्रेसले जित दोहोर्याउँदा दैलेखमा पहिलो जित हात पारेको छ।
गत निर्वाचनमा गठबन्धनबाट तत्कालीन एकीकृत समाजवादीका उम्मेदवार विजयी भएका थिए।
नेकपाले जितेका २ क्षेत्र
रूकुममा नेकपाका संयोजक पुष्पकमल दाहाल ‘प्रचण्ड’ विजयी भएका छन्। कालिकोटमा नेकपाका उम्मेदवार महेन्द्रबहादुर शाही विजयी भएका छन्।
गत निर्वाचनमा तत्कालीन माओवादीले जितेको दुवै क्षेत्र नेकपाले जोगाएको छ।
प्रतिक्रिया