युनिकोड
पूर्वप्रधानमन्त्री केपी शर्मा ओलीले नेपालीलाई भिसा र काम नदिने अवस्थामा देश पुगेको टिप्पणी गरेका छन्।
भक्तपुुरस्थित गुन्डुमा पार्टी निकट युवा र विद्यार्थीहरुलाई मंगलबार सम्बोधन गर्दै उनले नेपाल बदनाम भएको भन्दै यसबाट जोगाउन युवाहरू लाग्नुपर्ने बताए।
‘अहिले कस्तो भइसक्यो?,’ ओलीले भने, ‘भिसा नदिने भइसक्यो मान्छेहरुलाई। काम नदिने अवस्था बनिसक्यो। नेपाल एउटा बदनाम स्थितिमा पुगिसक्यो। त्यसबाट हामीले जोगाउनुपर्छ नेपालाई।’
उनले नेपाल इमान्दार र कर्मठ मानिसहरुको देश भएको समेत उल्लेख गरे। ‘नेपाल इमान्दार र कर्मठ मानिसहरूको देश हो, अत्यन्त जिम्मेवार, सभ्य मानिसहरूको देश हो,’ ओलीले भने, ‘ एउटा सभ्यताको लामो इतिहास भएको देश हो। र, त्यो सभ्यतालाई अगाडि बिकास गरेर लान तम्तयार भएको नयाँ पिढी भएको देश हो भनेर हामीले अगाडि बढाउनुपर्छ।’
उनले काठमाडौँ महानगरका मेयर बालेन साहप्रति संकेत गर्दै सिंहदरबार र संसद् भवन योजनावद्धरुपमा जलाइएको दाबी समेत गरे।
‘अन्तर्राष्ट्रिय सम्मेलन केन्द्रमा हमला गरेको पहिलो पटक त होइन नि। थुप्रै पटक भइसक्यो। यो एउटा योजनावद्ध काम हो,’ उनले थपे।
प्रतिक्रिया