सत्तापक्षको बैठकमा पुगिन् रञ्जिता

सत्ता गठबन्धनको बैठकमा नागरिक उन्मुक्ति पार्टीकी अध्यक्ष रञ्जिता श्रेष्ठ पनि पुगेकी छन्। कांग्रेस संसदीय दलको कार्यालयमा जारी बैठकमा श्रेष्ठ पनि पुगेकी हुन्। 

सत्तारुढ दल नेपाली कांग्रेस-नेकपा एमाले उपसभामुख इन्दिरा रानाविरुद्ध पदीय आचरणमा प्रश्न उठाउँदै पदबाट हटाउने तयारी गरिरहेका छन्। यसै विषयमा छलफल गर्न डाकिएको सत्ता गठबन्धन दलको बैठकमा उनी पनि पुगेकी हुन्।

कांग्रेस र एमालेले अहिले खाली पेजमा आफ्ना सांसदको हस्ताक्षर संकलन गरिरहेका छन्। बैठकमा कांग्रेस, एमाले, जसपा, जनमत र लोसपाका नेताहरूलाई पनि बोलाइएको छ।    
 
सरकारलाई दिएको समर्थन हालैमात्र फिर्ता लिएको दल नागरिक उन्मुक्तिकी अध्यक्ष श्रेष्ठ आजको बैठकमा सहभागी हुन गएपछि चासोका साथ हेरिएको छ।