युनिकोड
राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङदेनले राजा भोट राजनीतिभन्दा माथि रहने संस्था भएको बताएका छन्।
शनिबार वीरगञ्जको लालबगलामा आयोजित समारोहलाई सम्बोधन गर्दै उनले राजाको अभिव्यक्तिलाई लिएर दलका नेताको टिप्पणी गरेको विषयमा यस्तो बताएका हुन्।
प्रजातन्त्र दिवसको अवसरमा पूर्वराजा ज्ञानेन्द्र शाहले अहिलेको राजनीतिक दलहरूले देश बर्बाद बनाएको टुलुटुलु हेरेर बस्न नसक्ने अभिव्यक्ति दिएका थिए।
उक्त सन्देशपछि प्रधानमन्त्री केपी शर्मा ओली, पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल, नेपाली काँग्रेसका सभापति एवं पूर्वप्रधानमन्त्री शेरबहादुर देउवा लगायतका राजनीतिक दलका नेताहरूले पूर्वराजा शाहलाई पार्टी खोलेर निर्वाचनबाट आउन चुनौति दिँदै आएका छन् ।
सोही अभिव्यक्तिप्रति लक्षित गर्दै अध्यक्ष लिङदेनले अहिलेका नेताहरूसँग आफूहरू नै चुनाव लड्न पर्याप्त रहेको बताए। राप्रपाले राजनीतिक दलको राजा नभई देशको राजा स्थापित गर्न खोजेको उनको भनाइ छ।
‘राजाले पहाडमा नभएर मधेसको जनताले रोजगारी पाओस्। मधेसको जनताले गरिखाने वातावरण निर्माण होस् भनेर खोलेको उद्योगधन्दाहरू बेचेर खाए। कृषि औजार कारखाना, चिनी कारखाना, जनकपुर चुरोट कारखाना बन्द गरे र आज दर्जनौँ भ्रष्टाचार काण्डहरूमा उनीहरूको नाम मुछिएको छ। त्यस्ता नेताहरू अहिले राजालाई ललकार्दै छन् राजा चुनाव लड्न आऊ भनेर,' उनले भने, 'म भन्छु, तपाईंहरूसँग चुनाव हामी लड्छौँ। राजाले चुनाव लड्ने होइन। चुनाव लड्नको लागि हामी जस्ता मानिसहरू छौँ। हामीले खोजेको राजा, हामीले स्थापित गर्न खोजेको राजा तपाईंहरूसँग चुनाव लड्ने होइन। राजनैतिक दलको राजा होइन, देशको राजा खोजेको हो। राजा राजनीतिक दल भन्दा र भोटको राजनीति भन्दा माथि रहने संस्था हो।’
अध्यक्ष लिङदेनले अहिलेका राजनीतिक दलहरू देशभित्रै युवाहरूले गरिखाने वातावरण बनाउनेतर्फ अग्रसर नभएको बताए। अहिलेका राजनीतिक दल र नेताहरूले ३५ वर्षको समयमा केही काम गर्न नसकेको पनि बताए। प्रत्यक्ष निर्वाचित कार्यकारी, प्रदेश खारेजी गर्ने मागहरू आफ्नो पार्टीको रहेको उनको भनाइ छ।
प्रतिक्रिया