कृषि समिति सभापति थापाले लिइन् शपथ

प्रतिनिधि सभाको कृषि, सहकारी तथा प्राकृतिक स्रोत समिति सभापति कुसुमदेवी थापाले शपथग्रहण गरेकी छन्। बुधबार सिंहदरबारस्थित कृषि समितिको हलमा सभामुख देवराज घिमिरेले उनलाई पद तथा गोपनीयताको शपथ गराएका हुन्। 

नेपाली कांग्रेसकी सांसद थापा मंगलबार समिति सभापतिमा निर्विरोध निर्वाचित भएकी थिइन्। कांग्रेस सांसद वीरबहादुर बलायरको प्रस्ताव र नेकपा एमालेका सांसद सूर्यप्रसाद ढकालको समर्थनमा उनले समिति सभापतिमा उम्मेदवारी दिएकी थिइन्। 

समिति सभापतिका लागि अरू कसैको उम्मेदवारी नपरेपछि उनी निर्विरोध भएकी हुन्। यसअघि कांग्रेसकै आरजु राणा सभापति थिइन्। राणा परराष्ट्रमन्त्री भएपछि समिति सभापतिको पद खाली थियो।