युनिकोड
प्रधानमन्त्री पुष्पकमल दाहाल प्रचण्डले प्यालेस्टाइनी विद्रोही समूह हमासको नियन्त्रणमा रहेका सुदूरपश्चिम विश्वविद्यालयका विद्यार्थी विपिन जोशीको रिहाइका लागि आवश्यक कुटनीतिक पहल भइरहेको बताएका छन्।
सुदूरपश्चिम विश्वविद्यालयको चौथो दीक्षान्त समारोहलाई सम्बोधन गर्दै प्रधानमन्त्री दाहालले विद्रोही समूहले बन्धक बनाएका विद्यार्थी जोशीलाई सकुसल स्वदेश फिर्ता गर्न कुटनीतिक पहल भइरहेको बताएका हुन्।
कतारका राजा अमिरको आसन्न नेपाल भ्रमणमा विपिनको रिहाइको विषयमा कुरा राखिने उनले बताए।
‘केहीदिनभित्रै कतारका राजा अमिर नेपालको औपचारिक राजकीय भ्रमणमा आउँदै हुनुहन्छ। हामीले एउटा एजेण्डा विपिन जोशीको रिहाइमा कतारले खेल्न सक्ने भूमिकालाई पनि बनाएका छौँ,’ उनले भने, ‘आज बिहान मात्रै मैले कुवेतको एक टेलिभिजनलाई दिएको अन्तरवार्तामा पनि विपिनको रिहाइको निम्ति कतारले खेल्न सक्ने भूमिका बारेमा उल्लेख गरेको छु र डिमान्ड पनि गरेको छु।’
सिक्दै कमाउँदै कार्यक्रमअन्तर्गत इजरायल गएका सुदूरपश्चिम विश्वविद्यालयको टीकापुरस्थित कृषि क्याम्पसका १० जना विद्यार्थीको प्यालेस्टाइनी विद्रोही समूहको आक्रमणमा परेर मृत्यु भएका थिए। महेन्द्रनगरका विपिन जोशीलाई हमासले बन्धक बनाएर लगेको थियो।
कतारका अमिरले वैशाख ११ र १२ गते नेपालको राजकीय भ्रमण गर्दैछन्।
प्रतिक्रिया