युनिकोड
नेपाली कांग्रेसका महामन्त्री गगनकुमार थापाले हरेक व्यक्तिको सोचमा समय र समाजको प्रभाव हुनु जरुरी रहेको बताएका छन्।
आइतवार काठमाडौंमा बेला पब्लिकेसन्सद्वारा प्रकाशित उज्ज्वल प्रसाईको पुस्तक ‘एक बागीः खगेन्द्र संग्रौलाको साधना र संघर्ष’ पुस्तक लोकापर्ण समारोहमा बोल्दै उनले हरेक व्यक्तिको सोचमा समय र समाजको प्रभावसँगै संगतको प्रभाव हुन आवश्यक रहेको बताए।
उनले साहित्यकार संग्रौला आफूसरहका कांग्रेसी नेताहरुको पनि गुरु भएकाले उनको जीवन र साहित्य रचनाबाट हरेक नेपालीहरुले सिक्नुपर्ने कुराहरु धेरै रहेको बताए।
महामन्त्री थापाले आफ्नो जीवनमा खगेन्द्र संग्रौलाले नै प्रश्न गर्न र अन्यायविरुद्ध लड्न सिकाएको बताए।
उनले ‘एक बागीः खगेन्द्र संग्रौलाको साधना र संघर्ष’ पुस्तक खगेन्द्र संग्रौला व्यक्तिको जीवनमा आधारित नभइ समय र समाजले बुझ्नुपर्ने कुराहरु समेटेको पाएको बताए।
‘खगेन्द्र संग्रौला काँग्रेस त हुँदै होइन, त्यसमाथि कालो कांग्रेस हुने कुरै भएन। तर मेरो उमेरसमूहका थुप्रै कालो कांग्रेसीले खगेन्द्र संग्रौलालाई गुरु मान्छन्', उनले भने, 'प्रश्न गर्न र बागी हुन हामीलाई खगेन्द्र संग्रौलाले सिकाउनु भयो। उहाँसँग चिया खाँदासमेत धेरै कुरा सिकेँ। व्यक्तिको सोचमा समय र समाजको प्रभाव त हुन्छ तर संगतको प्रभाव पनि हुन्छ।’
महामन्त्री थापाले साहित्यकार संग्रौलाका पुस्तकमा समेटिएका हरेक शब्दहरुले समाजको यथार्थता र समयको मागलाई सम्बोधन गर्ने पाएको बताए।
प्रतिक्रिया