हङकङतर्फ नजिकियो गम्भीर आँधी फङवङ, टी१ संकेत जारी

हङकङमा टाइफुन संकेत नम्बर १ जारी भएको छ। गम्भीर आँधी फङवङ सहरतर्फ नजिकिँदै गर्दा सोमबार दिउँसो अब्जर्भेटरीले टी१ चेतावनी संकेत जारी गरेको हो।

आँधी मंगलबार राति र बुधबारको बीचमा झन् नजिक आइपुग्ने अनुमान गरिएको छ। जसले गर्दा मंगलबार उच्च चेतावनी संकेत जारी हुनसक्ने अब्जर्भेटरीले जनाएको छ।

आँधी सहरबाट आठ सय किलोमिटरको दूरीभित्र प्रवेश गरिसकेको र अब यो दक्षिण चीन सागरको उत्तरपूर्वी भागतर्फ मोडिने पूर्वानुमान गरिएको छ। बुधबारसम्ममा सबैभन्दा नजिक चार सय किलोमिटरको दूरीमा आइपुग्नेछ।

आज राति तटीय क्षेत्रहरूमा बाढीको सम्भावना समेत रहेको अब्जर्भेटरीले भनेको छ। त्यस्तै, मंगलबार र बुधबार वर्षासँगै बाढी आउन सक्छ।

यसपछि भने फुङवङ ताइवानको वरपर सर्नेछ। र, उत्तरपूर्वी मनसुनको प्रभाव बिस्तारै कमजोर हुनेछ।