हङकङमा बढ्यो बेरोजगारी दर

पछिल्लो तीन महिनामा हङकङको बेरोजगारी दर ३.७ प्रतिशतमा उक्लिएको छ।

जनगणना तथा तथ्याङ्क विभागको तथ्याङ्कमा जुलाईसम्मको पछिल्लो तीन महिनाको बेरोजगारी दर यति पुगेको हो। जसमा बेरोजगार व्यक्तिहरू ८ हजार ८ सय बढेर १ लाख ४५ हजार पुगेका छन्।

अप्रिल-जुन अवधिको तुलनामा मे-जुलाईमा यो दर ०.२ प्रतिशत अंकले बढेर ३.७ प्रतिशत पुगेको हो। बढी असर सुपरस्ट्रक्चर क्षेत्र, खाद्य तथा पेय पदार्थ सेवा गतिविधि क्षेत्र, खुद्रा क्षेत्र र घरजग्गा क्षेत्रमा परेको छ।

अल्परोजगारी दर भने १.४ प्रतिशतमा अपरिवर्तित छ।

श्रम विभागद्वारा जारी विज्ञप्तिमा बेरोजगारी दर बढ्नुलाई श्रम बजारमा नयाँ स्नातक र स्कुल छोड्नेहरूको आगमनलाई पनि कारकको रूपमा लिइएको छ।

साथै, उद्योगहरूको व्यावसायिक अवस्थालाई पनि उल्लेख गरिएको छ। विज्ञप्तिमा श्रम तथा कल्याण सचिव क्रिस सुनले श्रमशक्तिमा सामेल हुने नयाँ स्नातक र स्कुल छोड्नेहरूका लागि थप रोजगारीका अवसर सिर्जना गरिनुपर्ने बताएका छन्।